Ka Ulu Hoi 9.3

Hui, e na manu uau e makalahia a i ke aumoe! Ua ike aku anei oukou i ka hana keaka a Dwayne Johnson, a "The Rock" nohoi, ma Saturday Night Live? He aha ko oukou manao? Ua kani anei ka akaaka? Hu, kani ae la no ka akaaka i loko o'u. Oiai noonoo au he mea akaaka wale no ia hana keaka, puiwa mai au ke lohe aku i ka namunamu a Kiaaina Lukanela Duke Aiona.

I ka puka ana mai o ia hana keaka ma ka hoike kiwi kaulana o SNL, ua ikeia na kanaka o Hawaii i ke ano okoa loa. Ma kahi o ka hana maamau i hoike ia Hawaii me he Palekaiko la, hoikeia ka pilina maoli o na kanaka Hawaii ame na malihini i kipa mai na aina e mai.

I kona hana keaka ana, ua hoomeamea o Johnson ame Fred Armisen ma ke ano he elua mau kupa e hana nei ma kekahi hale aina o kekahi hokele. Ma ia hale aina, auana laua i kela me keia pakaukau i hoolauna me na malihini. Oiai ke mahui nei na malihini i ka oluolu o laua, kahaha lakou i ka Johnson laua o Armisen hoopuka ku ana e pili ana ia Hawaii; penei hoi, olelo kekahi wahine, "He wahi nani maoli o Hawaii e noho ai," o ka hai aku la no ia o na kanaka, "Ae, manao oe i kona ano mamua o kona poipu ana i na hokele. Eia kekahi mea oiaio: O ke kope ka Hawaii kapuka nui. O ke aha ka Hawaii kakomo nui? Na haole momona!"

Nui na kanaka ma Hawaii i mahalo aku i keia hana keaka no ka mea hoikeia kekahi ano oiaio o ka poe Hawaii, a kue ia ka mea maamau a olohewa e hoopili ai na malihini naaupo ia Hawaii; e laa, aohe pilikia ka na kanaka Hawaii no ka mea hula, himeni, a kui kakou i ka lei i kela me keia la. Hauoli no ka Hawaii i ke kipa ana mai o na malihini i ka pae aina o Hawaii!

Ma ka hana keaka i haiia'i ka manao io o ka hapa nui o na kanaka Hawaii a o ia oiaio ka mea i hoohuhu ai i ko kakou kiaaina lukanela, ia Duke Aiona. Wahi ana, e emi ana ka hookele waiwai i ka olelo a Johnson. Aohe he ike pono ma kana olelo – aole keia he oiaio hou. Mau makahiki ae la ka manawa i ikeia'i ka pilina ukiuki o na kanaka maoli ame na malihini naaupo. Ua paheneheneia keia pilina e na kanaka hoomakeaka he nui. O kekahi o ia mau kanaka hoomakeaka o Rap Reiplinger ka mea kaulana i hoohenehene i ka hooukiuki ana o kekahi kanaka maoli ame kekahi malihini i ka hana keaka o Room Service.

I kekahi mau manawa, hoohuhu ka oiaio, aka aole hiki ke alo ae, he oiaio no. Ua ike aku ka hapa nui o na kanaka Hawaii i ka hana keaka ma kona ano maoli, he olelo pahenehene. Nolaila, e ke kiaaina lukanela, mai huhu, e akaaka me kakou o lilo auanei oe i mea i hoopaheneheneia.