Ka Ulu Hoi 9.2

I ka la 31 o Ianuali i ka hapalua hola eha, hoikeia o Jay Dee "BJ" Penn laua o Georges "Rush" St. Pierre e hakaka ana ma ka MGM Grand i Las Vegas no ka hanana UFC 94. O keia ka manawa elua a laua i hakaka ai a ua hoaano laua no ke kulana o ka mahele kaumaha Welterweight. Hoolahaia keia hanana i ka lehulehu a puni ka honua ma Pay-Per-View.

O Jay Dee Penn, oia hoi o BJ, he mea Hawaii kaulana loa oia no Hilo Hawaii mai. Oia kahi akamai i ka hakaka ana. I keia manawa, oia ke pookela o ka mahele kaumaha Lightweight (155 mau paona). Mamuli o ke eo ana iaia o na kane apau i kona mahele kaumaha, ulu ae la kona iini e holomua a pii iluna. A nolaila, ua komo oia i kekahi mahele kaumaha e ae, oia hoi ka Welterweight. O BJ kahi kanaka nui o ka iini e holomua a pii iluna. Nui kona manao paa e hooi.

No Kanada mai o Georges "Rush" St. Pierre. O GSP kona inoa kapakapa kaulana. I keia manawa, oia ke pookela o ka mahele kaumaha Welterweight. Ano nui na manawa ana i hoopale ai i kona kulana. He keu kona haahaa. Wahi ana, aole maalahi kona wa kamalii. Pono iaia ke ao mai i ka hakaka i kona wa opio i mea e hoomalu ai iaia iho. Wahi ana, aole waiwai kona ohana a pono iaia ke hana nui no na mea apau. E like me BJ, aia iaia ka iini e oi ae.

I kela mahina aku nei, ua eo hou o BJ ia GSP. I ka manawa mua, ua eo o BJ ia GSP i ka hooholo ana a na luna kanawai. Maikai no ka hoike a BJ a he moakaka ole ke eo ana o GSP. I keia hakaka hou ana, loli na hana o na kane elua. O GSP ka mea nana i hoohaku maluna o BJ mai kinohi a i ka pau ana. Mahope o ka mahele eha, ua hookuia ko laua hakaka ana e ke kauka mamuli o ka hana oolea a GSP. Nolaila, mau no o GSP, he pookela no ka hakaka.

Aka nae, nui no na holoholo olelo a ka lehulehu a he pili kekahi i ke eo ana o BJ. O ka mea mua nui na mea e olelo ana ua mai no o BJ i na la mamua iho o kona la paio. Wahi a ka lohe, aia oia ma ka haukapila no ekolu mau la mamua o ka hakaka. Ua loaa oia i ka palu. I ko'u manao, hoikeia kona mai iloko o kona mau maka i ka hoomaka ana o ka hakaka. Aole hiki ke ikeia kona iini e lanakila ai. Malia paha, lilo kona manao i kahi e mamuli o kona mai.

Eia hou, ua hamoia ka Vaseline i na mahele kapu o ko GSP kino e kona kokua, e Phil Nurse. He kanawai ia o ka oihana, aole anaiia ka Vaseline maluna o ke kino holookoa. O ka maka wale no kahi e hamoia'i ka Vaseline. Eia aku eia mai hehiia keia kanawai e GSP ame kona hui. Aia kekahi mau mea hakaka e ae i ohumu i keia hana malu. Mamua o ka hakaka ana o BJ laua o GSP, olelo aku la o BJ i ka Nevada State Athletic Commission e pili ana i ka GSP hamo malu ana i ka Vaseline maluna o kona kino.

Anaiia ka Vaseline maluna o ko GSP kua ame kona umauma i ka mahele ekahi. No ke aha i hiki ole ai ia BJ ke hoopaa ia GSP? Mamuli no o ka Vaseline! Ua like no a like o GSP me ka i'a e hee aku ana a pakele aku i ko BJ puliki. Wahi a BJ, aole hiki iaia ke hoopaa i kona mau wawae mamuli o ka pahee o ka ili. A hiki iaia ke honi i ka Vaseline maluna o ko GSP umauma. Ua hoao mai o BJ e hai i ka uao aka aole oia i hilinai i ka olelo a BJ. Mahope iho, ua ike maka aku ko ka NSAC luna nana i ka anai ana i ka Vaseline a hai aku la oia i ka hui o GSP e ku ka hamo ana. Aka nae, aole lakou i hoolohe pono, a aole i ku. Anai hou lakou mahope o ka mahele elua. Ua hoao ko ka NSAC luna nana e kawele i ka Vaseline a holomua ka hakaka.

Mahope o ka hakaka, hoonuiia ae la ka moolelo e pili ana i ka Vaseline. E paleia na mea hakaka e ko laua mau hui. Nolaila, nieleia o Carver Wilcox, he kauka malama ili. Wahi ana, ina anaiia ka Vaseline a kaweleia i ka manawa pokole wale no, aia mau no ka Vaseline maluna o ke kino. Hele a pahee ka ili a he pilikia nui keia no ka mea hakaka. Ua hee ka Vaseline iloko o ka ili, a paa loa. Nolaila, aole hiki ke kawele wale ia a pau ka Vaseline. O ka acetone a i ole ka waikulu wale no ke hoopau. Mamuli o keia ae kapu, e hakaka hou ana paha laua i keia kauwela. Pehea kou manao? E hakaka no a hakaka ole paha?