Ka Ulu Hoi 9.2

Aloha mai e na hoa makamaka e kupaa ana i ka kakou olelo maoli. Oiai kakou ma Sakamaki no ke komo ana mai i na papa olelo Hawaii, no ka mea aia ka hapa nui o ka kakou mau papa Hawaii ilaila, ihea nohoi kakou e hele aku ai no ka paina ana, oia hoi o ke kuai ana mai i na mea ai ame ka ai pu ana me na hoa?

Mamuli o ka pii ana o na kumu kuai o na mea apau, he ano hoolaha keia no kahi wahi mauka iki o Sakamaki, ka i kapaia o Mala Hipi e ko'u wahi hoapili kikoola nui. Kapaia mai la keia wahi i ua inoa nei no ka poe e hele pinepine ilaila, oia hoi ka poe i komo ole i ke kamaa, ka poe i puliki i na kumu laau, ame ka poe e ku-e i ke kaua! E kala mai i kou wahi mea kakau ina ua henehene aku la i ka poe e hele i keia wahi – he mea lealea wale no. Aka, ina aole oukou i hele i ia wahi, e hele no! Ono loa na mea ai ame na mea inu a Da Spot laua o Govindas e kuai aku ai, a emi loa ke kumu kuai, aole ia i pii ae e like me ka Campus Center mau mea.

O Da Spot, aia ma kahi pili i Sakamaki a i ko Kuykendall eleweka (ka mikini e hapai ana i ka poe). Ke ku oe mamua o Da Spot, e huli hema a aia ilaila o Govindas ma kapa o ke alanui. E hele i Da Spot a e hoao i na mea inu like ole i wiliia. Iau e hele aku ai, makemake au e koho i kekahi mea like ole i kela me keia la. Oi ae no ka ono mamua o Jamba Juice!

Ina aole e ai i ka io, hele i Govindas. He ono loa ka mea ai o laila e pono ai ke kino. O ka io ka mea a'u e kuko ai, nolaila aole au e hele pinepine i Govindas, aka he mea maikai ko laila.

I keia mau wahi elua, kuaiia mai ka mea ai pono, nolaila e aho e hele aku ilaila no ka malama ana i kou kino, ea! He mea ai ia no Inia, no Tailani, a no Ikalia kekahi. A, he mea emi no na kumu kuai. Ke hele i Da Spot, hiki ke kuai mai i kekahi mea inu nui loa i wiliia me ka huaai, ka waiu, a pela aku no elima kala a ua hoohuiia no ka auhau! Oiai oukou e hele aku ai i Jamba Juice, e uku ana he elima kala a oi no kekahi mea inu maamau. Ke hele oukou i Mala Hipi a kuai mai i kekahi pa mea ai, e uku ana oe he elima kala no kekahi pa piha i ka mea ai, a he ewalu mau kala a oi kekahi pa like ma Campus Center.

Ina, makemake e hele i Campus Center a kuai mai i ka mea ai mai Taco Bell mai, e hele no, aka mai hele pinepine ilaila o lilo auanei i kanaka haehuola ole! Koe ka poe e hele mau ilaila, he wahi maikai kela mala, maikai no ke ola a maikai no ke kino.