Ka Ulu Hoi 9.1

E pani i kou mau maka a e manao ulu i ka Parediso. He aha kau e manao ai? Ike paha oe i na mauna haaheo, na awawa uluwehiwehi, na waihooluu o na pua like ole, na nalu eu o ka moana maluhia, puiliia e ka pumehana o ka la, ame ka pa ana o ke ahe kolonahe. "He kahiko hookahakaha no ia kula." (651) He kii maoli no keia o ko kakou aina nene hiwa nei.

I keia la, ke akeakea nei na paia o na halekui i ka pilina mawaena o na kuahiwi me ka moana. "Hemo ka pili a ka makemake." (824)

Ke hana pu nei o Mufi Hannemann, o Mark Scheibe, ame na kakoo no ke kukulu ana i kekahi alai hou ae, oia hoi, ke kaa uila. He iwakalua mile ka loihi o ke ala a he kanakolu kapuai ke kiekie maluna o ke alanui. E hoomaka ana ke kaa uila mai Kapolei a hiki aku i Ala Moana. Mawaena o Kapolei ame Ala Moana, aia ana he umi kumamaiwa hale hoolulu, makahi o Waipahu, Pearlrigde, Downtown, Ala Lilikoi a pela nohoi. E hooliloia ana ke kala he nui wale no keia papa hana nui, oia hoi, na piliona eha a puka elima. I keia manawa, hooulu kala mai la ke aupuni he ekolu haneli miliona kala no keia papa hana. I loa no a lawa ke kala i loaa i na kakoo o keia nahesa kila, e hoomaka ana ke kukulu.

He manao pono keia no ka poe e kalaiwa me na kaa he nui wale i ke alanui mai Kapolei a hiki i Ala Moana i na la apau. Hiki ia lakou ke hoonanea i ko lakou holoholo ana i ka hana ame ko lakou hoi ana aku i ka hale. Makaikai wale aku no lakou ma o a ma anei o ko kakou one hanau makamae mai ka lewa mai. Aole lakou e hopohopo i ka hao ana i ko lakou ohana, ke kumu kuai o ke kakalina pipii, ame ka nui kaa nohoi ma ke alanui. Aka nae, ina e holoholo kekahi mau kanaka, e kau ana no paha ka hapanui i na hola maa mau o ka nee kapekepeke ana i ke alanui (i ke kakahiaka ame ka auinala). He manawa pokole keia. Makemake kakou e uku i keia kumu kuai pipii no keia kaa uila e hoohanaia ana no paha no kekahi manawa iki? E hoopau wale ana kakou i ka kakou kala.

Eia kekahi, mahea e kukuluia'i na hale hoolulu? Mahea e hookuia'i na kaa o na ohua? Nui ka aina e hoohanaia ana no keia papa hana. E hoomaewaia ana ko kakou aina waiwai no ke kukulu ana i na hale hoolulu a e kaapuniia ana ua mau hale hoolulu nei e ka poe hale kuai like ole. E hopu aku ana o Mufi ma i ka aina neo no keia mau mea, aka aohe aina.

No na lawaia, he pomaikai maoli no ka holoholo ana ma ka moana malie, ka ike ana i ka aina hanau mai ka moku mai, alaila, ka hanapaa ana o kekahi i'a kamahoi. Aka nae, i ka holoholo ana ma kai o Ala Moana, aole hiki ke ikeia na mauna haaheo ame ke awawa uluwehiwehi kekahi. Ina e hui pu ana ka poe hale kui me ua nahesa kila nei i ka hoopupuka ana i ko kakou kii o ka Parediso, e makapiapia maoli ana no keia. E kuu aku kakou i keia papa hana a hoolilo pono i ke kala no na kula like ole, ka noeau hookele waiwai, na kanaka hale ole, a pela wale aku. Nolaila, e hoole kakou i ke kaa uila a malama i ka aina no na hanauna hope.

2009 . Ipolani Jaimes