Ka Ulu Hoi 9.1

Ua poniia ae la o Pelekikena Obama, he "kamaaina," i ka mahina nei o Ianuari. Lilo oia ka pelekikena paele mua loa. Hele aku la elua paha miliona kanaka i Wasinetona D.C. e ike i kela aha poni. Hauoli au i keia huliau? Hauoli no! Aka nae, he pomaikai keia huliau no ko Hawaii, no ka lahui Hawaii paha? A, ua hoomanao aku la nohoi kakou i ka opeaia ana o ka lahui Hawaii ma Waikiki i ka la 17 o ua Ianuari nei me ka hana kue. Pehea ka manao o ka poe Hawaii? Hauoli ka poe Hawaii he nui i ka Pelekikena ilipuakea ole mua i Amelika, aka, e noonoo kakou i ko kakou ea Hawaii.

I keia kolamu, heluheluia ka hua olelo "kamaaina." Heaha ka manao o ia hua olelo i keia au hou? I huikau ole ai oe, e ka mea heluhelu, penei ka'u ma keia kolamu nei. No ka poe i hanauia i ka pae aina o Hawaii nei, kapaia lakou he kamaaina. No ka poe oiwi o Hawaii, ka poe maoli hoi, kapaia nohoi lakou he oiwi.

Ua hanau o Ann Dunham ia Barack Obama Jr. i Hawaii nei iaia i hele ai i ke Kulanui o Hawaii i Manoa. Hui pu o Dunham ia Barack Obama Sr. ma Manoa nei i ke kulanui; o Obama Sr. ke kanaka paele mua i komo i ke Kulanui o Hawaii nei, wahi a ka paena punaewele o Ke Kulanui o Hawaii, o Malamalama. Haalele o Dunham ia Hawaii e kaahele i Akia Hikina Hema e kokua i na poe malaila; hana nohoi o Dunham i kana kekele laeoo. Oia ke kumu i hanaiia'i o Obama Jr. i Inidonesia. Mahope iho, hanaiia o Obama Jr. e kona kupunahine, e Madelynn Dunham i Oahu nei. O "Toots" kona inoa kapakapa no ka tutu wahine. Kapaia ae la oia pela mamuli o ka hua olelo "tutu." Nolaila, i ka hapa nui o ka wa opiopio o Obama Jr., ua noho no i Hawaii nei.

Iau i nana ai i ka pahu hoolele kii, ikeia ka hui puhi ohe o Punahou a e shaka ana o Pelekikena Obama ia lakou. Piha haaheo wau i ka ikena i ka poe kupa o Hawaii ame ka shaka ana. Ua hapaiia ae au e malama, kokua, a kakoo kekahi i kekahi; aole wale no o ka poe oiwi. Aka, pehea ka manao o keia poe oiwi e ae no ka hoolaulea ana i ka poniia ana o Pelekikena Obama e ko Amelika? E kokua ana paha ka manao o Pelekikena Obama ia Amelika, aka, pehea ke ea o Hawaii nei? Heaha ko kakou makemake no ko Hawaii i ka wa e hiki mai ana?

He kanaka maoli au a kakoo no i ko Hawaii, aka, ua hanaiia au i ke ano Amelika, no laila, pehea ko'u manao? Pohihihi keia mau manao okoa, o ka manao Hawaii ame ka manao Amelika. Nui na ninau e pili ana i ke ea o Hawaii no ka mea na kekahi kamaaina e alakai ia Amelika Hui Pu Ia. E kokua ana ka Pelekikena ia kakou?

Hauoli au i ka poni ana ia Pelekikena Obama no ka mea alakai oia i na lahui e ae. I ka wa i hala, na ka Pelekikena o Amelika Hui Pu Ia e alakai ana i ka honua ame na lahui e ae. Eia he laana: oia hoi ka economic crisis o keia au hou. I ko Amelika Hui Pu Ia hookele waiwai i haule ai, haule no ka hookele waiwai o na lahui e. I ka hapa nui o ka manawa, kaukoo na lahui like ole ia Amelika Hui Pu Ia. I ka nuhou ma ka pahu hoolele kii, ua hoolaulea ka poe a puni ka honua no ka kakou pelekikena hou. Maikai keia hoolaulea ana o na poe like ole?

Oiai hanaiia ae la o Pelekikena Obama ma Hawaii nei, ike oia i kekahi mau manao Hawaii. Hiki paha iaia ke hoohalikelike i ka waiwai o Hawaii ame ka manao o Amelika. Ike no oia i ka Hawaiian Renaissance no ka mea ma Hawaii no oia i kela manawa. Aole hiki i keia Pelekikena ke hoopoho i ka manao o ko Hawaii. I ko'u wahi manao, aole hiki ia Pelekikena Obama ke malama ole i na oiwi o Hawaii. Aia a nana ole oia, alaila, aloha ino oia, aka, he aha ana ka hopena? E kakali kakou a ikeia i na makahiki eha e hiki mai ana.