Ka Ulu Hoi 9.1

I keia mau la, nui ka poe haole e hele mai i Hawaii nei a hana ma anei. Iloko o ia mau poe haole, he kanaka imi naauao no. Hele mai keia mau kanaka imi naauao a hana ma na ulu laau like ole. He aha ka lakou e hana nei i ia wahi? Ia lakou e hele mai ai, hana ka poe imi naauao ma ka ulu laau a hoi koke i ka aina e. Loaa ia lakou ka ike hou e pili ana i ka laau Hawaii a malama ole i ko kakou. Pai lakou i ka ike hou no lakou iho, a aole ike ka poe Hawaii i ka ike i loaa. He kolea paha ka hoa like.

E ka mea heluhelu, e koiia paha ka poe imi naauao e noi i ka apono ana o ko Hawaii mamua o ka lakou hana ana ma ka ulu laau? Oia maoli no ko ka poe Hawaii aina. I ka poe imi naauao e hele ai i ka ulu laau, hookaawale lakou i kekahi apana o ka aina a hookapu i ia wahi. He pilikia no keia, no ka mea, ina nele ka poe Hawaii i kekahi laau no ka laau lapaau a pela aku, a aia ia laau i kela aina, aa hewa ia paha ka poe Hawaii i ko lakou komo ana, me he la he komo hewa ia. No ke aha la? O ko ka poe Hawaii aina ia!

Olelo ka poe imi naauao, makemake lakou e komo pu a haawi i ke kaiaulu Hawaii i ka ike hou i loaa. Ina paiia ka pepa ma ka olelo Hawaii, pela paha e hoouluia'i ka hoihoi o ka poe Hawaii, a kakooia nohoi kakou. Alaila, hiki ke maopopo i ka poe Hawaii ka hana a lakou ma ka ulu laau, a maopopo no i ka kakou olelo ponoi. E hoomaka ka poe imi naauao e unuhi i ka lakou moolelo no na laau ma ka olelo Hawaii. A, ina o ka poe Hawaii ke unuhi i na moolelo, ukuia ka poe Hawaii e ka poe imi naauao. Kakooia ka olelo Hawaii, ka imi naauao, ame ka poe oiwi kekahi. Ke ulu ae ka hoihoi, hiki no ke hakuia kekahi mau hana hou. Malaila hoi e ulu ai ka olelo Hawaii kekahi, no ka mea, ina makemake ka poe imi naauao e pai i na moolelo hoopokoleia ma ka olelo Hawaii, pono e ao i ka olelo Hawaii! Hiki paha i keia hana ke houlu i ka hoihoi o ka poe Hawaii i ka lilo ana i kanaka imi naauao. Kakaikahi no ka poe Hawaii ma ka oihana imi naauao. I keia manawa, aia wale no he elima poe Hawaii i ka mahele ike noeau i ka laau. He minamina wale, oiai he oihana keia e malama i ka laau oiwi o keia aina.

Nolaila, he manao ko'u e hakuia kekahi papa no ke pai ana i keia mau moolelo no ka laau oiwi. Me he mea la, he papa nupepa kahiko ia. I keia papa, aoia na hua olelo hou o ke akeakamai, a hakuia na hua olelo hou kekahi! Ke puka, uku ia na haumana i ke kala e na kanaka imi naauao, mai ka waihona kala pekelala paha. Hana paha na haumana malalo o ka mahele olelo Hawaii a i ole malalo o ka mahele ike noeau i na laau. A, ola no ka olelo, ka ike no ka laau Hawaii, ame ka poe oiwi o ka pae aina nei.