Ka Ulu Hoi 9.1

Aloha kakou. Ua hoopuiwaia paha oukou i ka uku kula no keia kau nei. Aue, ke hoopii hou ia nei ka uku i keia kau.

Aka nae, aole i ikeia ka pii ana o ka palekana ma ke kula nui o Hawaii ma Manoa nei. Iloko o na makahiki ekolu o'u i noho ai ma ka hale noho haumana o Wainani, aihueia ko'u mau paleaahu ma ka lumi holoi lole elua mau manawa ma ua hale noho haumana nei! Manaonao a makau no au i kela mea. Nolaila, hele aku nei au i kahi a na alakai e noho ai e kokua i na haumana ma ka hale noho haumana a hoike aku i keia pilikia o'u. Noi aku nei au ia lakou e kau i na pahupaikii ma ka lumi holoi lole i ikeia ka aihue pinepine ana malaila. Noi aku nei nohoi au i ke kiai poo e kau i na pahupaikii, aka nae, aole kau iki ia kekahi pahupaikii malaila. Loaa na leka uila a ka hui kiai o UHM e wehewehe ana i na mea pilikia ma ke kula nui nei i ke kau i hala iho nei. Wahi a ua hui kiai nei, aia ewalu mea pilikia i hoikeia ma UHM no eha mau mahina i hala iho nei.

He aihueia ana ma ke ala nui o Dole ma Kepakemapa, ma ke ala nui Lowrey ma Kekemapa, ma ka paka o Kanewai i kahi kokoke i Kamakakuokalani ma Kekemapa nohoi, ka limanuiia ana ma kahi hale noho haumana ma Kekemapa, a pela aku. I ko'u noho mau ana i ka hale noho haumana i ka makahiki 2005, aia na kiai poo e kiai hele ana ma kela me keia po a i ia makahiki, hooku na kiai poo i kela me keia kaa e komo a puka ana a ninau ke kiai poo i ka poe kalaiwa e hoike i ka lakou palapala ae kalaiwa, a kakau iho ke kiai poo i ko lakou mau inoa. A, kii lakou i keia mau palapala ae mamua ko lakou hele ana aku i kahi o ka hale noho haumana a hoihoi aku i ua palapala ae nei ka poe kalaiwa i ko lakou haalele ana. Maikai maoli no kela hana no ka mea, hoomaopopo ka mea kipa, e kiai mau ia ka hale noho haumana a pale aku no paha ia i na pilikia e loaa ana malaila.

He 3,139 kala ka uku no ka haumana mai Hawaii nei no ke kau Kupulau i ka makahiki 2009. I ko'u nee ana mai Okinawa mai i Hawaii nei no ke kula, he eha mau makahiki i hala aku nei, he 4,992 kala ka uku no ke kau no ka haumana mai ka aina e. Aka nae, he 8,467 kala ka uku kula no keia mau haumana mai ka aina e no keia kau nei. Aue nohoi e, pehea la? Nui ka hoopii hou ia ana no ekolu makahiki!

Aka nae, aole wau i ike i na kiai malaila i ko'u noho ana i ka makahiki i hala aku nei. Aohe o lakou hooku ana i na kaa ma ka ipuka o ka hale noho haumana ma ke aumoe ame ka hopena pule. Ihea i hele ai ka poe kiai? Aohe anei he kala o ka kakou kula nui no ka uku ana no ka pakelana? Aole paha, no ka mea, i ko'u kipa ana i ka lumi hooikaika kino i kekahi la, nui na mikini hou no ka hooikaika ana. Ua hana mau au i na mikini kahiko aka nae, eia no ka mea hou. E aho paha ka waiho ana i ka mea kahiko, a malama i ke kala.

Maikai nohoi ko lakou hoolilo ana i ka kakou uku kula no ka hooikaika kino ame ke kahua paani, no ka mea, he pono paha ke kokua i ka poe malaila, aka nae, e hoolilo mua ia ua kala nei no ka palekana no kakou apau loa.