Ka Ulu Hoi 9.1

Mai ka wa kahiko a hiki i keia wa ano, hele mai ka hapa nui o na malihini, a iini lakou e hooko i na mea i olu ai lakou. Nana lakou i na aina uluwehi a noonoo i na hana e loaa ai ke kala. He mea maikai no lakou, aka i ka holo ana o ko lakou manao, aole lakou e malama a e ihi i ka poe ame na ike ame na hana o Hawaii. I ko lakou iini ana e ko ko lakou hana, na lakou i kepakepa i na hana a ka wa kahiko.

Ma ka lae o Haena, ke pihoihoiia nei na uhane o na kupuna i ka naue ana o ka aina. O ke kumu o keia hanana ka iini o kekahi kane mai Kaleponi mai e kukuluia he hale. O kona makemake e kukuluia ka hale i kahi kokoke i ka lae kahakai, oia ka mea i hoomaka i ka pilikia, aka i ka manawa i pihoihoiia'i na iwi iaia, ua lilo i pilikia nui no ka poe o Kauai.

Ina e kukuluia ka hale, e noho ka hale maluna o kanakolu mau iwi kupuna. O ka hapa nui o lakou, he wahine a he keiki. Nolaila, loaa ke aumeume mawaena o Joseph Brescia ame ka poe o Kauai.

I mea e malama ai i ia mau iwi, ua hele kino na kamaaina i na halawai o ka Aha Kuka Kalana a ua noho hoi ma kahakai. Ma ka halawai o ka Aha Kuka Kalana i hai manao ai ka poe kue e pili ana i ka hewa o ke kukulu ana maluna o na iwi, a ua aelike na lala me ka poe kue. Maopopo ka hewa ia lakou, nolaila, ua hooleia ke noi kukulu e na lala o Barbara Say, o Mark Hubbard, ame na kakoo e ae.

Wahi a na lala o ka Aha Kuka, malia o hiki ke haawiia ko Brescia aina i ka mokuaina nana e malama, a loaa mai ka tax write off no ka uku ana ia Brescia. Aole nae kakoo ka Aha i ka haawi kala ia Joseph Brescia.

Oiai ua hooleia ke noi, makemake o Joseph Brescia e holomua kana hana. Ua kali oia a aneane piha eono mau makahiki. Aka, o keia hale, aole ia he hale no kona noho ana no ka mea he hale no kona. He hale hoomaha ia! Ke noho ole ia ka hale e ia, e hoolimalimaia i kekahi poe. Hewa nohoi kona manao, aole anei?

Mamuli o kona iini e hoomaka i ke kukulu i noho kahakai ai na kamaaina i mea e pale ai i na iwi i kela me keia la. Me ka manaolana e hoopau i ia kukulu i hele mai ai na kanaka mai na mokupuni e ae i kakoo i ka poe o Kauai.

Ano, a puni o Hawaii nei, nui na wahi e like me na hokele, na hale kuai, a pela aku, i kukuluia maluna o na iwi o na kupuna. No ke aha la e loaa ole ai na kanawai e hoopau i keia mau mea? No ke aha la e kupu ai keia ano pilikia e paio ai kanaka? Minamina loa nohoi ia, a o ka eha o na kanaka ka hopena. Hana mao ole ka ua o Hilo.

Aia ka pono o ka hookumu ana o ke aupuni i na kanawai. Malia o hoi koke ke kapu i ka aina ame na iwi, alaila hiki i na kupuna ke noho me ka maluhia. Ina loaa na kanawai ia kakou i keia hope aku, hiki ke kaohiia keia mau mea a hiki i na kanaka ke noho me ka nanea. He manaolana ko'u e kepekepa ole ia na iwi a e noho me ka maluhia i kupono. I ulu no ka lala i ke kumu.