Ka Ulu Hoi 9.1

Auhea oukou e na haumana eleu, e na hoi e ulu nei i ka aina uluwehiwehi o Manoa? Aloha mai kakou apau. Aia kakou ma keia kula nui nei no ka mea o ka hoonaauao kekahi mea nui no kakou. Manao kakou, "O ke kahua mamua, mahope ke kukulu." A o ka hoonaauao ia kahua. He kokua ka hoonaauao i ka holomua ana o na opio Hawaii. Hele kakou i ke kula no ke ao ana mai i hoomaikai a hooikaika i ko kakou mau ola. Aia ka malamalama i ka imi naauao.

Ua ike mai nei ko kakou mau kupuna i ka waiwai o ia malamalama. I ka wa kahiko, he poe hoonaauaoia na kanaka Hawaii. Ua noii mau ke kanaka i ka ike o kekahi kumuhana a he loea oia. Like nohoi ka manao a hiki i keia wa. Aka nae, i keia au, ke alaiia nei ko kakou holomua ana i ka hoonaauao e kekahi luhi nui.

Oiai ke emi nei ka waiwai i ke au nei, ke hana oolea nei na kanaka i ola pono no lakou. Oi aku ka pipii o ka nohona i ke au nei mamua o ke au kahiko a e uku nui kakou no na mea like ole, oia ke kakalina, ka mea ai, ka hale ame na pono hale, a pela wale aku. A oiai ke hana nui nei kakou i hoomaikai i ko kakou mau ola, ke piholo nei na hui a ke pau nei na oihana he nui. He nani ia, ke hopohopo nei kakou e pili ana i kela mau mea nui, pehea la kakou e uku ai i ka uku kula?

I keia makahiki kula (oia no ka hooilo 2008 me ke kupulau 2009), uku na haumana mua puka he 5,952 mau kala ina he mau kupa no Hawaii nei. A aole i heluia ke kumu kuai o na puke, ka uku hale, ka mea ai, a pela wale aku. Nolaila, aole hiki i kekahi o na haumana ke uku i keia uku nui. Ina hala ke kaupalena o ka uku kula ana, a aole pau i ka ukuia, alaiia na haumana i ka hoomau ana i ka lakou imi naauao. He minamina no ia.

E na haumana, mai haawi pio! Aia paha he haina e kaa ai keia pilikia nui. Nui na mea e kokua i ko oukou hele kula ana. Aia na waihona kokua hoonaauao he nui no na haumana Hawaii ame na haumana e komo nei i ka papa olelo Hawaii ame ka papa ike Hawaii. I keia mau la, aole nui ke kala a emi paha ka puu kala o kela me keia waihona kokua hoonaauao, aka, he mea kokua kela me keia kenikeni.

I ka hapanui o ka manawa, aole noi na haumana i keia mau mea kokua no ka mea, aole hoolahaia ia mea kokua. Nolaila, eia kekahi papa o na waihona kokua like ole ame na la e pono ai ka palapala noi.

Liko Ae Native Hawaiian Scholarship Program*
Ka Palena Pau: Pepeluali 1, 2009
No ke kau kupulau 2009 ame ke kauwela 2009 keia noi ana. E hoao no ma ka paena punaewele o https://likoae.org/home.asp.

Free Application for Federal Student Aid (FAFSA)
Ka Palena Pau: Malaki 1, 2009
He pono ka hoopihapiha ana i keia mea mamua o ke noi ana i kala mai ke Kula Nui o Hawaii ame ka hapanui o na haawina kala hele kula. He ehiku miliona a oi mau kala ko ke kula nui nei no na haumana. E ee i ka paena punaewele o http://www.fafsa.ed.gov/index.htm no ka ike hou.

Hawaii Community Foundation+
Ka Palena Pau: Malaki 2, 2009
Aia ma kahi o 50 a oi mau haawina kala hele kula like ole. E imi a loaa na haawina kala hele kula no oukou pakahi ma ka paena punaewele o https://www.hawaiicommunityfoundation.org/common/login.php?pg=S.

Ke Alii Pauahi Foundation Financial Aid & Scholarships*+
Ka Palena Pau: Apelila 1, 2009
E noi ma ka paena punaewele o http://www.pauahi.org/scholarships/application/.

Kuaana Student Services Tuition Waiver*
Ka Palena Pau: Mei 1, 2009
He hui o Kuaana ma lalo o Ke Keena o Na Hana Lawelawe Haumana i UHM i hookumuia no na haumana Hawaii. E kipa i ke keena ma ka hale o Liliuokalani Student Service center a i ole e leka uila ma kuaana@hawaii.edu.

*no ka poe oiwi wale no
+pono na leka kakoo

E akahele! E hiki koke mai ana ka palena pau o kela me keia waihona kokua hoonaauao. E hooko i na koina. A e nana pono no ka mea, no kekahi mau waihona kokua hoonaauao, he koina ke kulana piha manawa oia hoi he 12 ai o ke kau. He mahele wale no keia mau haawina kala hele kula no na mea kokua he nui. He mea waiwai lua ole ka hoonaauao a e hopohopo ole kakou i ka uku ana no ke kula. Nolaila, e mikiala oukou. E eleu oukou. A mai poina, "Na ka eleu mikimiki, nana e ka lawe lilo!"