Ka Ulu Hoi 9.1

No oukou keia moolelo, e na makua apau loa o na keiki he elima makahiki a emi iho. I ka manawa o'u i hapai ai hele aku la au i ka NBC no ka Baby Expo. Oiai au ma ka Baby Expo loaa iau kekahi keena hoihoi nana i hoolaha i kekahi polokalamu no ka heluhelu ana. Kapaia ua polokalamu nei o "Your Baby Can Read." I kela manawa, e ulu ae ana ko'u hoi no ko'u lilo ana i makuahine hou. Imi ae la au i na oihana hoonaauao apau loa e hooko ai i ko'u makemake e lilo ka'u pepe i mea akamai loa. Mamuli o ko'u iini e ao mai ai e pili ana i keia polokalamu, noi aku la au i kekahi kalepa e ku ana mahope o ke keena e hoike mai iau. Emo ole, ua lilo au i kona manao.

O Kauka Robert Titzer ka mea nana i hoomaka i ua polokalamu nei. He mea noii kamalii oia. Ao aku la oia i na keiki he nui i ka heluhelu ana mamua o ka piha ana o ka makahiki elima ia lakou. E noii ana oia no umikumalima mau makahiki a e holomua ana oia. Loaa ke kekele laeoo iaia mai Penn State mai a loaa iaia ka lae ula mai ke kula nui o Indiana mai.

Hoikeia he oi aku ka maalahi o ke ao ana mai o na keiki ina hiki ia lakou ke heluhelu i na makahiki mua loa. I na makahiki mua o ke keiki, hoohanaia na synaptic connections he kaukani a oi i kela me keia kekona iloko o ka lolo poo. A i keia manawa e weheia ae ai ka puka o na keiki no ke ao ana mai. A nolaila, o keia ka manawa kupono no ke ao ana. Wahi a Titzer, hoomohalaia he 90% o kou lolo poo i na makahiki mua elima. O keia ke kumu e ao aku ai i ia mau makahiki. Nui ka waiwai. Wahi a Titzer, "Hiki ia oe ke hoolaa i kou manawa me kau keiki no elima mau makahiki a ao aku iaia i ka heluhelu ana a i ole, e kokua oe iaia no umikumawalu mau makahiki a hiki i kona puka ana ae mai ke kula kiekie." Eia kekahi palapala kuhikuhi i loaa ai mai ka paena punaewele o Your Baby Can Read. E hoikeia ka holomua ana.

Eia ka moolelo e pili ana i ka hoomaka ana o ua polokalamu nei. O keia polokalamu, oia kekahi kahua hoomohala olelo mikiala. I ko Titzer keiki wa kamalii, ua hoao oia e ao aku i kana kaikamahine i ka olelo i kakauia. Hoomaka ae la oia i kana ao ana aku i ka manawa a kana pepe i hanauia mai ai. Penei na mahele o kona ao ana aku i kana kaikamahine. O ka mea mua, kakauia ka hua olelo ma ka pepa. Alaila, heluheluia ka hua olelo me ka hahai ana o kona manamana lima malalo o ka hua olelo. A mahope iho ua hoike aku o Titzer i ka hua olelo me ka hana ana a me kekahi mamala olelo me ua hua olelo nei. Ua hana o Titzer i keia ano o ke ao ana me ka hana hou ana i kela me keia la. Nui ka manawa ona i hoomaamaaai i kana keiki no ka hooikaika ana i kona heluhelu ana.

Eia kekahi, ua hoohana oia i kekahi mau paani hua olelo e hooikaika i kona heluhelu ana. I kekahi la, ua hoomaopopo o Titzer i ka hiki ana i kana kaikamahine ke heluhelu a maopopo na huaolelo. I ko ke kaikamahine mahina eiwa ua hiki iaia ke heluhelu i kekahi hua olelo a hana e like me ka manao o ia hua olelo. Ua heluhelu oia i ka hua olelo head a hoopa aku la oia i kona poo. Ua hiki iaia ke hana pela no na hua olelo apau no ke kino. No ka hua olelo chewing, ua hoike oia i ka mama ana. I ko ke kaikamahine makahiki eha, pii ae la kona heluhelu ana i ka pae o ka makahiki umikumakahi. Mamuli o ka holomua ana o keia ano o ke ao ana aku, ua hoomaka o Titzer i keia polokalamu.

I keia manawa kaulana no keia polokalamu a puni ka honua. Nui na mea o keia polokalamu e kuai mai ai. Aia elima mau mahele: o ka hoolauna, na mahele hana he ekolu, ame ka hoi hope. He DVD, he puke, a he mau pepa hua olelo ko na mahele apau. Nolaila, nui na mea e kokua ia oe i ke ao ana aku ame ka hooikaika ana aku i
ka heluhelu ana o kau keiki. E ee i ka paena punaewele no ka polokalamu oia hoi yourbabycanread.com.

Kakooia keia polokalamu e a'u ame ko'u ohana apau loa no ka mea e holomua ana no ko ka'u kaikamahine heluhelu ana. Nui na mea maikai i ka hana ana i keia polokalamu. Hoonuiia ka hilinai, a he kokua ia i ka holomua i ka wa e hiki mai ana. Hooikaikaia ka hiki ana ke ao mai. Mamuli o ko'u iini e ao aku iaia me ka wikiwiki, hiki i ka'u kaikamahine ke heluhelu me ka maikai! Ua hoomaka wau e ao aku i ka'u kaikamahine i kana mahina elua. Nana aku la oia i na DVD Your Baby Can Read i kela me keia la no eha mau manawa. I keia manawa, he umikumalima ona mahina a hoihoi mau no oia i na DVD. Aole oia hoihoi ia Barney a i ole Dora a pela aku. Makemake oia i keia mau DVD a oia wale no. Heluhelu wau iaia no ka hapalua hola i kela me keia la. A hoomaa maua i kana heluhelu ana me na pepa hua olelo ame kekahi mau paani hua olelo. Mamuli o ka maua hoomaamaa ana, hiki iaia ke heluhelu!

Manaoio no au i keia polokalamu mamuli o ka hua o ka maua hana. I ka wa kahiko, aole he mea nui ka heluhelu ana no ka mea oleloia na moolelo apau. Aka, i keia manawa o ka heluhelu ana ka mea nunui e holomua ai i ke kula a i ka hana. A pehea ka hoololiia ana o keia i mea olelo Hawaii. Pehea la? He manao ko kakou e holomua i ka olelo Hawaii a ao aku i ka kakou mau keiki i ka olelo Hawaii. Eia kekahi hana maikai loa e ao aku ai. Pono kakou e hoomaka i na makahiki mua loa e like me Titzer. Maikai kona manao e pili ana i ka hoomohala ana. Malia paha, hiki i kekahi kanaka eleu ke hoomaka i kahi polokalamu hou, oia hoi "Hiki i Kau Keiki Ke Heluhelu." Hiki i ka'u kaikamahine ke heluhelu, aka ma ka olelo haole wale no! He mea maikai no ina hiki iaia ke heluhelu i na mea elua, ma ka olelo Hawaii ame ka olelo haole. O na makahiki mua loa ka manawa e hoomaka ai i ka heluhelu ana. Mai lohilohi! O ka kakou poe keiki na alakai o keia mua iho nolaila pono kakou e hoomakaukau ia lakou.

E hana pu!