Ka Ulu Hoi 8.9

He aha ia mea he Hawaii, he kanaka Maoli, he Oiwi? Aole paha i like ka manao o ia mau huaolelo no kela me keia kanaka. No ke kanaka o ka aina e, ua pili paha ka manao i na kanaka e noho ana ma ka mokuaina o Hawaii. Ua like no a like ke kapa ana i na kanaka e noho ana ma Hawaii he Hawaii me ke kapa ana i na kanaka e noho ana ma California he Californian. Aohe mea e okoa ai. Ua pili ka wehewehe ana no ka Hawaii i kahi o ka noho ana o ke kanaka.

No ke kanaka hoohawaii, pili ka wehewehe ana i ke ano o ke kanaka. Ina hoikeia ke ano o ka Hawaii ma o ka hana, ka lokahi, ka laulima, a pela wale aku, he Hawaii ke kanaka. Oia hoi he ano "Hawaiian at Heart." Ina pela, mea ole ka aina e hanau ai ke kanaka, mea ole hoi kona mookuauhau. Ua pili keia wehewehena o ka Hawaii i ke ano o ke kanaka.

No ke kanaka hoowahawaha i ka Hawaii, he lahui namunamu, moloa, aa noonoo ole ka Hawaii. Namunamu wale ka Hawaii e pili ana i ka hookahuli aupuni. Inu wale ka Hawaii i ka pia. Nui hewahewa na Hawaii ma ka hale paahao, a i ole me ka ole o ka hale. He mea pono ka hoonaauao ana i na Hawaii. He mau kanaka kapakeu wale ua mau Hawaii la. Ma keia wehewehe ana, he ano kuamuamu paha ia i ko lakou waha.

I ke keena hoomahelehele aina hoopulapula, ua pili ka wehewehena o ka Hawaii i ke koko. Ina he kanalima pakeneka a oi ke koko Hawaii o ke kanaka, ua hiki ke loaa ka aina pulapula i ua kanaka la. I ka ahaolelo kau kanawai, pili ka wehewehena o ka Hawaii i ke kanaka nona ke kupuna e noho ana ma Hawaii mamua o ka makahiki umi kumahiku kanahiku kumawalu. Ua pili no ia manao i ka loihi o ka noho ana o kekahi ohana ma Hawaii ame ka mookuauhau o ke kanaka.

He mau manao okoa keia. O ka Hawaii no paha ke kanaka kupono e wehewehe i ka manao o ka huaolelo o Hawaii. Nolaila, e ka Hawaii, he aha ia mea he kanaka Hawaii? Ina he koko Hawaii ko kekahi, oia hoi ina he kupuna Hawaii ko kekahi, ina pili kona mookuauhau i ka pae moku nei, he Hawaii oia. Oia ka wehewehena maamau. Aole i hiki ke hooleia. I ka hookumuia ana o ke keena hoomahelehele aina hoopulapula, ua hookumu pu ia ke ana ana i ka nui o ke koko Hawaii o ka Hawaii. Mai ia hope mai paha kahi i hookumuia ai he ano hookuku o ka Hawaii me ka Hawaii. O ka manao o ia huaolelo, o Hawaii, ua hoololi iki ia mamuli o keia ana koko ana. Ua komo keia ano wehewehena epekema, keia manao haole i ka poaiapili o ia huaolelo, a ua noho no a paa.

Nolaila, i keia au e holo nei, ua hele a maa kakou i ke ana koko ana no ke keena hoomahelehele aina hoopulapula, me ke keena o OHA, me ke kula o Kamehameha paha. Maopopo i kela me keia Hawaii o keia au ka nui o kona koko Hawaii, e like me kai kuhiia i keia ano onaehana. Ina he kanaha kumaiwa pakeneka a emi mai paha ka nui o ke koko Hawaii o kekahi, aole i hiki i ua kanaka la ke kakau inoa ma ka papa inoa o ke keena hoomahelehele aina hoopulapula.

Ma o keia ana koko ana, makanaia kekahi, a kapae wale ia kekahi. O ke koko, aole i hiki i ke kanaka ke koho i ka nui me ka liilii. Aole i hiki ke kohoia ka nui o ke koko Hawaii o kekahi. Nolaila, makanaia kekahi a kapae wale ia kekahi mamuli o ka nui o kekahi mea i koho ole ia. Ua hiki ke loaa ka aina hoopulapula i ka Hawaii me ka ole o ka hana ina ua lawa ka nui o ke koko. O keia paha kekahi kumu no keia hookuku o ka Hawaii me ka Hawaii.

Oiai aole i hiki ke kohoia ka nui o ke koko Hawaii o kekahi, ua hiki no ke kohoia ka hana a kekahi. Ma ka hana ka ike. Ke komo kekahi i ka hana, he koho kana no ka mea aia iaia ka holomua o kana hana ana. Nui no na hana noeau Hawaii. Ina komo kekahi i ka hana Hawaii, oi aku ka ike ana he Hawaii ia kanaka mamua o ke kanaka moloa e noho ana ma ka aina hoopulapula? Aole paha. Oi aku paha kana mau hana noeau Hawaii, oi aku paha kona ike Hawaii. Aole nae i hiki ke anaia ka nui o ka Hawaii o kekahi. Ina he Hawaii kekahi, he Hawaii oia. Aohe waiwai o ke kuhi ana i ka nui me ka liilii o ke koko Hawaii. He mea hoopilikia wale nohoi ia, a pili ole i ka manao Hawaii.

He mea pono ka hooki ana i keia hookuku ulala. Aole kupono ke kuhi ana, me ka hoohalahala ana o kekahi i kekahi no ke ana ana i kona ano ame kona koko Hawaii. O wai ke hiki ke kuhi i ka oi aku o ka Hawaii o keia mea mamua o kekahi mea? He noonoo wale ia na Waawaa iki. Ua like me ke kuhi ana oi aku ka Hawaii o Tutu Pukui mamua o Kamehameha no ka mea ua kakau oia i ka puke wehewehe olelo.

E kapae kakou i keia hookuku ana o kekahi me kekahi. Pehea kakou, ka lahui Hawaii, e holomua ai i keia au e hiki mai ana ina aole kakou laulima? E waikahi ka pono i manalo. E pupukahi kakou, e kokua kakou kekahi i kekahi. He kanaka haaheo ka Hawaii, aole he kanaka pehu. Nolaila e lauhoe mai na waa. I ke ka, i ka hoe, i ka hoe, i ke ka, a pae aku i ka aina. He mea pono keia e hoike i ka kakou holo mua ana i keia au, no ka mea ua hoike e ia i ke au i hala.