Ka Ulu Hoi 8.7

Mamuli o ka nui o na poe makaikai i ke kiionioni o Noho Hewa ma ka Poakahi nei, ua piha kui ka hale, aohe wahi koe e noho aku ai na kanaka he nui wale. Nolaila ana e hoike manawalea ia ai ke kii onioni i keia pule. Aohe mea e uku ai no ka nana ana i ua kiionioni nei ma ka Poalima ame ka Lapule. Oia iho la na la o ka ike ana i keia kiionioni i pili i ka noho hewa ana o na kanaka o ka puali koa, na malihini, me na kanaka oihana kuai aina. Makahi o kanahiku minuke ka loihi o ua kiionioni la, a ua hiki ke ikeia na kanaka like ole i ninaueleia ma ke kiionioni, oia hoi o Kaleikoa Kaeo, Haunani-Kay Trask, Noenoe Silva, a pela wale aku. He waiwai ka ike maka ana ame ka lohe pepeiao ana i na ninau nui o Hawaii nei ma o ke kuana ike o ka Hawaii. Nolaila he wahi paipai keia ia oukou, e na Hawaii e hele a nana, e nana a ike. Mai noho wale, e eleu mai!

Ma hea ia? Ka Hale Hoikeike Kiionioni o Dole Cannery
Ahea ana ia? Poalima 3:30 auinala; Lapule 6:45 ahiahi
Kumu kuai? MANUAHI