Ka Ulu Hoi 8.6

Aloha e na hoa makamaka e hoi mai ana mai ka wa hoomaha kauwela oluolu. Oiai he oluolu a eleu paha ko ke kauwela i keia makahiki, ke holo nei ke au o ka manawa, a oi ae ka eleu o keia wa haulelau. He wa koikoi nohoi keia wa haulelau mamuli o ke koho ana i Pelekikena hou o ke aupuni o Amelika. Kuhihewa kekahi mau kanaka, aohe pono e koho i Pelekikena, a aole na lakou ke kuleana e koho balota ai. Aka nae, na kakou apau ke kuleana e koho ai i ka Pelekikena hou ma keia wa no, no ka mea, nui ka mana o na kanaka Hawaii.

Waiwai no ke kukakamailio ana no keia kumuhana no ka mea, pono kakou e hookamaaina iho i na ala apau i hiki ke heleia e kakou. Malia paha, ninau mai nei oe, e ka mea heluhelu, heaha ka pilina mawaena o keia wa koho Pelekikena ame na kanaka Hawaii. Ina oe nana mau i ka nuhou a i ole i ka aha aupuni o na Kemokalaka, ikeia paha o Barack Obama ame kona kahua kalaiaina. Mamuli o ko Obama pilina me Hawaii nei, hoao oia e hoakoakoa i na kanaka e kakoo iaia i kona hoomeamea ana he kanaka oia i kamaaina i na iini o ka poe Hawaii ame na pilikia e ehaia ai kakou. Nolaila, pili aku oia me na kenekoa elua o Hawaii, o Inouye laua o Akaka, a kakoo o Obama ia laua. I ko Obama hai olelo ana i mea e ae ai i kona kohoia i moho no na Kemokalaka, i mai la oia, kakoo oia i ka Native Hawaiian Government Reorganization Act, a aia no a kohoia oia e apono no oia i ia pila.

I ka lohe ana i ka nuhou no ka Obama kakoo ana i ka pila, puiwa nohoi au, no ka mea nui na ninau i kupu mai iloko o'u. Aole makaukau a kupono o Obama no ka hooholo ana i keia mau mea no na kanaka Hawaii. Aole ia o ke kanaka kupono. Nolaila i kupu mai ai kekahi ninau no ko iala kakoo ana i keia pila, ame kana kukala ana mai i ia manao i loheia e ka lehulehu. Aole i hoolaha mau ia ko Obama pilina me ia pila, a ma ia pilina paha e weheweheia ai kona kumu no ke kakoo ana. Aole oia hoike lea i ka ike ona i na moolelo politika o na kanaka maoli o ka honua holookoa. Ina kamaaina oia i keia ano o na politika, malia paha, maopopo nohoi iaia na mea e pono ai na kanaka Hawaii. Aka nae, aohe mea i hoopukaia i hoike mai la i ka hana mua ona no ka pono o na lahui maoli. Ina he malihini keia mau ano o ka politika iaia, malia he kumu okoa kona no ke kakoo ana i ka pila.

Kohu ohana paha na Kenekoa o keia aupuni ke aelike lakou i kekahi manao. No Hawaii o Inouye laua o Akaka, a wahi a kekahi mau kanaka, me he mea la o Obama ke ano "Kenekoa Ekolu" o Hawaii nei. Malama nui ia o Obama e Akaka laua o Inouye, a kokua aku kokua mai no. Nolaila, noonoo au, oia kekahi kumu o ko Obama kakoo ana i keia pila. Ina hoolale oia i na kanaka kakoo iloko o ka aha Kenekoa, e hoomaka paha oia me na kanaka i hanai iaia malaila. Nui ka hana a laua ala e kokua a malama ai ia Obama, nolaila, o ko Obama kakoo ana i ka pila, he hana ia e mahalo ai ia laua. Eia nae, aole wale no ma ka aha Kenekoa o Obama e hoakoakoa ai i na kanaka kakoo. Kakoo nohoi oia i keia pila i mea e umeume ai i ka lehulehu o na i'a e holo nei i ke kai holuholu o Hawaii nei.

Nui na kanaka Hawaii i kue i keia pila mai ka hoopuka mua ana i ka MH 2000 a i keia makahiki. Nui ka leo o na kanaka e kakoo ole, aka, kuli o Obama i ka iini maoli o kakou. Ina nanamaka oia i ka huhu o na Kanaka Maoli i keia pila e malama ka ia kakou, aole pono kona kakoo ana i ia mea. Malia paha, malama maikai ia ae ka poe Hawaii ame keia ano o na politika e kekahi kanaka i makaukau a kamaaina loa i ia mau mea.

Mahalo nui wau ia Kenekoa Obama i kona akamai ame kona haahaa ame kona iini nui e hoohuli i ke ano o na politika ma ke aupuni. Aka nae he hana keia i hiki ole iaia ke hooholo. Aole e kakoo ka nupepa Ka Ulu Hoi i kekahi o na moho e kulia a lilo oia ka Pelekikena, aole makou e hoao nei e alakai i kau koho ana. Nau no ke koho! Ke hahai wale nei no makou i keia kumuhana i mea e ulu ai ko oukou noonoo pono ana i na mea like ole o na politika, a i mea e ulu ai ko oukou hoi no ke koho ana.