Ka Ulu Hoi 8.5

Aloha mai kakou e na mamo o na aina apau mai ka la hiki a ka la kau. O ka'u moolelo keia no ka hoike ana ia oukou e malama pono o loaa oe i na mea poino o na kahakai i Hawaii nei. He kiai ola au ma ke kahakai o Wawamalu a i ko'u ike ana aku i na mea poino o ia kahakai, aia ka pono o ka wehewehe ana aku i ia mau mea poino.

O ke poo o nei moolelo, he olelo noeau hou ia a'u i haku ai. He kiai ola no au a oia ka makou makia. He manao nui keia no na kanaka e kipa mai ana. Malia, aole maopopo i kekahi na mea weliweli o ke kai. Nui na mea e pilikia ai oe ma na kahakai i Hawaii nei, a aia ka pono o ke ao ana aku i ia mau mea ia oukou i ole e make.

He keu a ka poino! Nui na kuamoo i haki ma keia kahakai. Aia na aumiki i ke kai a ko aku i ka moana me ka ikaika loa. Pono oukou e nana i na nalu a nana hoi i na kanaka heenalu.
Ua piha na makahiki eha i ka'u hana ma ke ano he kiai ola, a i ia mau makahiki a'u i kiai ai, nui na manawa i loaa ai na kanaka i ka poino. Ma ke kahakai o Wawamalu, oia hoi o Sandy's, malaila au e hana ana, a i na la apau nui na ohana e kipa mai ia Wawamalu. E aho makou e walaau aku ia lakou a hoike i na mea poino pili i ia kahakai. I kekahi manawa maopopo paha na mea a makou e olelo ana. Aka nae i ka nui o ka manawa, mahope pono o ka makou olelo ana, komo wale lakou iloko o ke kai me ke akahele ole! Tsa, aue nohoi e!!!

Nui loa ka lealea ame ka maalahi o ko'u oihana, a noonoo iho la na kanaka he nui, like ke kiai ola ana me ka Baywatch hoi. Holo mama me ka lele ana o na poli iluna a ilalo, nana wale aku mai ka hale kiai ola, a pela aku. Aole loa pela, tsa! Pau ka nui o ka manawa i ko makou noho ana i ka hale kiai, aka i ka manawa a makou e hoopakele ai i kekahi kanaka, oi loa ka makou hana ana.

Makemake au e hoike i keia mau mea i maopopo keia kai ia oukou, i maopopo ke ano o Wawamalu. He manao nui keia no ka malama ana i ko oukou mau ola. Nui na mea a'u i ike ai ilaila. Oi aku ka weliweli o Wawamalu mamua o na kahakai apau i Hawaii nei. Aka nae, he kahakai maikai loa a he nani no. Oia ka'u kahakai punahele. Nolaila, e hoomaopopo oukou, "ina he kanalua, e malie!"