Ka Ulu Hoi 8.5

Ua ka ua, ola ka honua. Ola ka honua, kuonoono ke kanaka. Lawa kupono ka meaai, hu ae la ka hoi o na kanaka e malama i ka aina a uluahewa i ola mau na hanauna. Auhea oukou e na kupu o neia aina mai kekahi kapa a kekahi kapa aku o Oahu. Oiai, ua hala auanei ka la malama i ka honua. Makemake au e paipai ia oukou e na mamo a Haloa e malama i ka aina. Eia kuu wahi manao i kupu ae mai loko mai o ko'u naau i hoeueu i ka ulu ana o ka hoi iloko o ko oukou naau.

He wa nui keia e malama ai i ka aina i hiki ia kakou apau ke ola ma kekahi honua oluolu o ka noho ana. O ka la iwakaluakumamalua o Apelila ka la i malamaia ai o Earth Day ma ka honua a puni. Ma keia la no e nana pono ai ka poe ma ka honua a puni i na mea i pili i ka aina a e ku-e ai i na hanaino e hana mau ia nei ma ka honua. Nani ke akamai o ke kanaka i hookumu i keia la nui, oia no o Gaylord Nelson. He kenekoa oia no Wikonekia mai i paipai i ka pono no ka aina. E ole oia nei, malamaia ai kekahi la no ka honua. Hoomaka iho la ia hanana i ka makahiki umikumamaiwa kanahiku i mea e hoohanohano ai i keia hale nui o kakou oia hoi ka honua. Hoolauleaia keia la nui e elima miliona kanaka a oi i keia wa. Nolaila, mamuli o ka ike i aoia mai, heaha ka kakou hana?

He mea maa mau ko kakou kauoha ana i na kanaka apau e "malama i ka aina" ma o ke kanu ana i kekahi kumu laau, ka hoopoaiapuni ana i ka kakou opala, a pela pu me na mea e pono ai ka honua oluolu o ka noho ana. Kai no ua lawa ko kakou malama ana i ka aina i keia wa, aka nae, he mea akamai no ke ao ana aku i na hanauna e ulu mai nei i na mea e pono ai ka aina i keia mua aku. Nolaila, ua kupu keia manao mai loko mai o'u, heaha ko kakou kuleana i keia manawa?

E huli a kau aku i na maka i ka lehua kea, mai huli kua i ke ala pono i maa i ka heleia e na kupuna. Oiai kakou e mau ai i ka pii ana i kuahiwi, o malama i na wehi a na kupuna o ka waiho ana io a ia nei o hala e ka Puulena. Oiai, o ka malama aina kekahi mea nui ia kakou apau. E hanai kakou i na pua e mohala nei e auamo i keia kuleana i hele lakou a maa i ka malama ana aku, alaila, e hooikaika ana kakou ia kakou iho, i ka lahui. O ka pua hoi, oia na keiki o ka aina nei. Ma o ko kakou ao ana ia lakou i na mea pono o ka aina, o ka aapo mai la no ia o lakou i ka ike a hoomau i ka huakai a hoea aku i kela lehua kea, oia no ka aina uluwehi, no ka mea he alii ka aina, he kauwa ke kanaka. I keia wa, puni na keiki i ka noho ana ma ka hale a paani i ka lolouila a nana i ke kiwi, oiai, ua hele a maa kakou i keia nohona.

Eia la ka haina, ua like no me ke mele a ka auna o Olomana i himeni ai, i meleia penei, "e alu like mai kakou." Na kakou e hoomaka, alaila, e hoike kakou i na keiki i ka hana pono i hiki ia lakou ke ao i na hanauna e hiki mai ana mahope o lakou. Pela no kakou e malama ai i ka aina ma o na keiki.