Ka Ulu Hoi 8.5

Ua ikeia no na lawehala pamake ehiku; ka pehu, ka lili, ka pakela ai, ka inaina, ka alunu, ka moloa, ame ka aako. Ua ike paha kekahi i ke kii onioni o Se7en me Brad Pitt laua o Morgan Freeman, ea? O na lawehala ehiku ke kumu no ka inoa. A i ole ua nana paha kekahi i ka pukaina polokalamu kiwi o America's Next Top Model. No kekahi hookuku, ua hoikeia na lawehala ehiku ma o ko lakou mau kii. Ma keia mau wahi paha i ikeia ai na lawehala ehiku, o keia no na loina o ka hale pule Kakolika Loma.

I ka mahina nei, ua kukalaia mai la kekahi mau lawehala hou e ka Pope o ka hale pule Kakolika Loma. Eia na mea i kukalaia he lawehala: na hana e ku-e i na bioethics, elike me ke kaupalena hanau; na hoao i kapaia he mea morally dubious, elike me ka stem cell; ka pakela ai laau; ka hoohaumia ana i ka aina; ka hoonui ana i ka puunaue o ka waiwai ame ka ilihune; ka pakela waiwai; ame ka hoopakaneo. O keia mau mea na lawehala hou i kauia mai ma ke ano he keehina hana mamuli o ke ano o ka nohona i keia mau la. Aka nae, o keia ano haku hou ana, he ano pakaha keia hana. Mehe mea la, aia oe ke paani nei i ke kinipopo peku a loaa ka ai. I ia wa, kukala okoa ka luna kanawai, aole aeia ka holo wawae, o ka lele poloka wale no. Nolaila auaia ka ai. Ua hewa, ea? Ke hoololi nei oia i na lula mawaena o ka paani ana!

Maopopo iau, ke hoao nei lakou e liliuewe i mea e kohu like ai me ka poe o keia au e nee mai ana. Aka, o ke ano o keia mau lawehala hou, kuhikuhi pono ia. Mamua, ua haawiia mai na lula ma ke ano he pahuhopu wale no, a na kakou e koho i ke ala maikai e hoea ai ilaila. Mehe mea la he alakai ia, ke kukui hele po i ko kakou ola. I keia manawa, ke kuhikuhiia mai nei na hana maikai ame na hana maikai ole, ma ke ano he lula paa.

O na lawehala ehiku kahiko, he mau kanawai ia e maikai ai ka pilina mawaena o na kanaka. Aka, o na mea hou, he mau mea ia no ka pilina mawaena o ka poe ame ka aina a he pili paha i ke ola ponoi o ke kanaka. O na lawehale kahiko ehiku, aole ia he ku-e kanawai, he hana kolohe wale no. O na lawehala hou, he mau manao na ka aha hookolokolo e apono a hoole paha. Nolaila, e lilo ana ka hale pule i ano aha hookolokolo i mea e koho ai i na mea hiki ame na mea hiki ole ke hanaia? I keia wa nui o ka lawehala, e kolia mai ana ke kaula i maloeloe. Pela no ka haku kanawai – o ke kuleana keia o ka hale pule?