Ka Ulu Hoi 8.5

E ka mea heluhelu, he kaao hou keia i hoopuka mua ia ma ka helu elua o KUH nei.
Hoomauia ma anei nei. -LH

Aole i ala mai ka hiamoe o ka makua. Hopu iho la o Kaiwaokapo i kana mau pua nui a houhou aku la i kana poe pua iloko o na maka o kona makua. O ke kolopa aku la no ia o kona makua. Houhou mau o Kaiwa me ka ikaika i na maka o kona makua a ku mau aku la na pua iloko o ka onohi maka. O ke kiomana mai la no ia o Kaiwaokapo maluna o ke kino o kona makua a hoopaa i na lima i ole e pakele ka makua. Pahuhu ae la ke koko mai na maka me he luai pele la a olaola ke koko iloko o ka waha o ka makua a ua paakiki ka hanu ana. Hoao mau ka makua e akelekele aku i keia popilikia aka hoopaa mau ia oia e ke keiki e Kaiwaokapo. Aole i kana mai ka manaonao o nei hana a ke keiki.

Ua aku la ka makua me ka uwalo, "Auhea oe e ke keiki, i uka ka make, i kai ka make, pau iho la ka luhi i ka po." Aole i liuliuma hope iho, kuu maoli no ka luhi o ka makua a naauaua aku la o Kaiwaokapo.

Iaia no a honi aku i ka ihu o ka makua, o ke kipa mai la no ia o ka iole iaia nei me ka olelo ana mai, "E ke keiki, e waiho i ke kupapau a na makou na iole e malama." Pane ke keiki i ka olelo ana aku, "O ke kupapau o kuu makua, na'u no e malama o pau i ka aihue ia, o ka makau paha ka hope o ka iwi. Na'u no ke kupapau o ka makua."

Pane ka iole i ka i ana mai, "E ke keiki, o keia ka ka makua i pulama ole aku ia oe, o kona aloha, he aloha no na kanaka hoolimalima wale no. Ua mo ka piko e ke keiki; na makou na iole e lawe aku i ke kupapau." Mamuli o ko Kaiwaokapo noonoo ihaiha, kau aku oia i keia mele.

Ku aku la ka pua i ka maka
O ka maka eueu ole
O ka eu a ke keiki
He poino wale
He aa hewa wale
O ka opu kekeue
Ue, ue,
Aue e ka hulu manu e –

Pane ka iole i ka paeaea ana mai, penei:
O Kaiwaokapo
Ke keiki eu
Ke keiki apiki
Piki ka pua
Piki ke ao
O keia ka po o oe ka iwa
Pau ka makua
Ekikilau ke kupapau
Ka heana na‘u ia
O Kaiwaokapo he iwa no

Aole no i kana mai ka hihia maluna o ke keiki no keia olelo a ka iole e i mai nei.
Aole i pau…