Ka Ulu Hoi 8.5

E na kahu o Laka. E na kahu o ka hula ana. E na lala o na kumu hula like ole o keia au nei. Malia paha ua nana iho nei oukou i ka hookuku hula o Merrie Monarch i ka hopena pule mua o Apelila nei. Hoike aku la he mau halau hula i ka hua o ka lakou hoomakaukau ana no ia hookuku hula. Koikoi loa ka hula i ka poe Hawaii. Ke hele mai ka poe malihini i Hawaii nei, manaolana lakou e ike ana i ka hula ana e like me ka mea i nanaia ma na kii onioni. O ka oiaio, aole kela o ka hula maoli ma keia pae aina nei. I ka wa kahiko, malamaia ka hula ana i mea e hoohanohano ai ia Laka, ke akua o ka hula. I keia au nei, hoohanohanoia o Laka aka nae o ka mea nui ka hoike ana i ka manao o ke mele ma o ka hula ana. He ano kukai manao ka hula ana o ka olapa ame ke anaina. Ma ke kuhi ana o na lima, ilaila no ka manao o ke mele. Nolaila, e ola ana no ka olelo i ka hula ana. Oiai, puni ka poe malihini i ka hula, nui na hoike hula ma Waikiki. A ua pii ka hoihoi iloko o ka poe Kepani e ao i ka hula.

Nui ino na Kepani e nana i ka hookuku hula. Hu ae la ka iini o ka poe Kepani e ao i ka hula i keia au nei a mau no ko lakou ake e komo i ka hookuku hula o Merrie Monarch. Aka nae hooleia ko lakou komo ana i mea e malama ai i ka poe hula ma Hawaii nei. Aole i makemakeia e lilo keia hookuku hula i na Kepani no ka mea, he mea Hawaii ka hula ana. Aka he mea ole keia i ka poe Kepani a mau no ka hoihoi o ka hula ana ia lakou ala. Nolaila, aia ma Iapana kekahi hookuku hula e like me ka Merrie Monarch a pinepine no ka hele ana o na kumu hula o Hawaii nei ilaila i mea e ao ai i ka hula.

Aka nae aole wale no ka Merrie Monarch o ka hookuku hookahi i hoopiliia ma Iapana. Aia nohoi ka hookuku o Keiki Hula ilaila. O ka halau e lanakila i ka hookuku ilaila, nana e komo ana i ke Keiki Hula ma Oahu nei i ke kauwela. Aole like keia me ka Merrie Monarch ma Iapana a hopohopo kekahi e loli ana auanei ka loina o ka Merrie Monarch ma Hawaii nei a e hiki ana i ka halau lanakila o Iapana ke komo i ka hookuku ma Hilo.

Ma Hawaii nei, koikoi no ka Merrie Monarch ame na hookuku e ae i na pua o ka hula ana ame ka lakou mau kumu hula kekahi. Nui ino ka hana no ka hoomakaukau ana no ia mau hoike hula. A o kekahi, papaia na olapa aole e ai i kekahi ano meaai i ole e pilikia ke ola kino. Pili keia hana i ka hana a ka poe Hawaii i ka wa kahiko. Aole paha i maopopo lea keia hookapuia ana, aka nae, he mea ia e hoomakaukau i ka manao ame ke ola o ka poe e hula ana. Malia paha, aole i malamaia ka wa kapu e ka poe Kepani no ka mea aole lakou i kamaaina iki i ka hana a ka poe Hawaii i ka wa kahiko.

O kekahi hana e pili ai ka poe hula o keia au nei me ka poe o ka wa i hala ka ohi ana i na mea ulu no ka hana ana i lei no na olapa. Nui na mele ame na oli e aoia no ka ohi ana i na laau ame ka lei ana i na lei. Hoopaanaau ka olapa i na oli a pela nohoi ka hana o ka poe hula i ka wa mamua. Ina aole maopopo keia ano mele i ka haumana hula, mahaloia na akua o ka nahele ma o ka hookupu. Aka, aole paha i ike iki ka poe Kepani i keia ano mele a ina hula lakou ma Iapana, mea ole ka mahalo ana aku i na akua Hawaii o ka nahele no ka mea aohe a ua akua nei noho ilaila. Iloko no o ka maopopo ole i ke Kepani ke kaina kupono e hoomakaukau ai no ka hula ana, nui ko lakou hoihi i ka hula.

Luuluu no i ke kaumaha no ka mea koikoi no ka hula ana no ka malama ame ka hoola ana i ka loina Hawaii aka nae aole i mahalo pono ia e ka Hawaii apau loa. Ike wale ia ke ake o ke Kepani e hula aka aole pili ka hula i ko lakou moomeheu ponoi. Aia nae ia lakou ka hulahula Bon ame ka hana kupono e hoomakaukau ai no ia mea i kela me keia makahiki, no laila o ka hula ka mea i lealea wale ai no lakou. Ma Hawaii nei, aole i mahaloia ka hula e like me ka Bon a ke Kepani. Nui ino na hoike ma Waikiki i like ole me ka hula ana a ko kakou mau kupuna. Hoikeia keia ano hula no ka hoohauoli ana i ka poe makaikai wale no. A auana ka hula mai ke ala i hoopaaia e ka poe hula i ka wa i hala. He mea ole ka hula ana o ke Kepani ina lilo ole ka hula maoli ia Iapana. Nolaila, o kekahi haina, e kaupalenaia ke komo ana o na halau mai Iapana mai i na hookuku a i ole na hoikeike nui ma Hawaii nei. A o kekahi e ae, hoomau na olapa Hawaii i ka malama ana i ka hula i pili loa i ka hula a ko kakou mau kupuna, alaila e hoao e hoi hou i ia ala i paa mua.