Ka Ulu Hoi 8.5

Mahea na kii onioni Hawaii, na kahua punaewele Hawaii, na kanela kiwi Hawaii ame na keena lekio Hawaii? Mahea la! E na oiwi, mai hopohopo, i keia au i ka pae aina o Hawaii nei, nui na mea hou e hanaia nei i ola ka olelo Hawaii. Oia no ke kinohi o ke au hou oia hoi ka wa e hoola hou ai i ka olelo makuahine!

O Ahai Olelo Ola ka inoa o ka mea hou loa ma ke kiwi. Ma ka la umi o ka mahina o Malaki i hoomaka ai ka poe Hawaii i keia ano nuhou ma KGMB9. Na Amy Kalili e kukala i ka nuhou kuloko o nei aina. Olelo mai o Amy Kalili e pili ana i na moolelo no ke kanaka Hawaii ame na kula kaiapuni Hawaii. Ua ikeia kekahi moolelo nuhou e pili ana i ka ohana Harman, ame ko lakou kamailio ana i ka olelo makuahine iloko o ko lakou hale. He maka mua hou no keia no na hoike nuhou Hawaii.

E ka mea heluhelu, e ee nohoi i MaoliWorld!

He kahua punaewele hou keia ma ka punaewele puni honua. Like ia mea me ka MySpace, aka no ka poe oiwi ia. I keia manawa, hiki no ia kakou ke hoomau i kela kaila o ke kahua punaewele me ka nele ole i ko kakou olelo makuahine. He ano puuhonua paha keia no ke kamailio ana ame ka nanea. Nui nohoi na poe Hawaii e kukakuka nei ma ia paena punaewele. O Ikaika Hussey ke kanaka Hawaii i hoomaka i ua mea la. He maka mua hou no keia no na kahua punaewele Hawaii.

I kou lohe ana i ka lekio, hoolohe anei oe i ke Kipuka Leo? Ina aole no oe i lohe i keia mea, pono no e maliu aku ka pepeiao. O Kipuka Leo ka inoa o kekahi papahana olelo Hawaii, he kipuka no ma ke kanela lekio o ke kulanui nei. Na kekahi haumana olelo Hawaii e alakai i ia mea a nana no e kamailio malaila. Hiki ia kakou ke hoolohe i na mele Hawaii ma ke kanela Hawaii a o keia hoike lekio ka mea e hooikaika i ko kakou mau pepeiao. Wahi a ka olelo noeau, Nana ka maka, hoolohe ka pepeiao, paa ka waha. Ia kakou e hoolohe ai i ke Kipuka Leo, ulu ae la ko kakou ike Hawaii ma o ka maopopo ana o ke kaona o ke mele. Mai laila mai paha e ulu ai he keena lekio olelo Hawaii ma Oahu nei.

Ma ka la umikumalima ame ka la umikumaono o Mei i hoikeia ai na kii onioni pokole i hanaia ma ka olelo Hawaii. Na na haumana kula nui nei i hana i keia mau kii onioni pokole. O Nanea ma Kahakai ka inoa o kela hanana. Aia ka hoike kii onioni ma ke one o Waikiki. Mamuli o ka hoikeia ana o keia mau kii onioni Hawaii, nui na kanaka mai ka aina e i ao e pili ana i ka ike Hawaii. I na makahiki i hala iho nei, hana aku la ka Aha Punana Leo i na ano kii onioni like ole, a hoikeia nohoi kela mau kii onioni i kahakai. He maka mua hou no keia no na kii onioni Hawaii.

Ano okoa paha keia mau hanana, aka aia he hookahi manao e hoopili ana i ia mau mea. Oia no paha ke kumu e hanaia nei keia mau hana hou ma ke kiwi, ka punaewele puni honua, ka lekio, ame ke kii onioni – o ka hoola ana i ka olelo oiwi o keia aina nei. I ka hoomaka hou ana o keia mau mea Hawaii, makemake na kanaka he nui e olelo Hawaii a e ao aku i ko kakou moomeheu Hawaii. Aole no kakou e hookulike i ke ano o ka poe Amelika. Mamua, ua ikeia ka nele ana o kakou i na mea Hawaii io a ia nei, aka nae me ka hoola hou ia ana o ka olelo Hawaii pii ae la ko kakou hoihoi no ka hana ana i na mea Hawaii.

He lei ui no hoi ia, a he lei pau ole. I kekahi mau manawa, mae paha kekahi mau pua aka kuiia no he pua hou a hoomauia keia lei pau ole. Ke kui hou ia kekahi pua ui, ola hou ka lei a he nani lua ole. O ka wai no kekahi mea e hoola i ia lei pau ole. E pi wai kakou i ole e make ko kakou lei ui. Eia nohoi na pua hou e kuiia ai keia lei pau ole. E ola hou ko kakou lei!