E o e na liko o Hawaii, na liko e ulu ae nei, e ulu ae nei me na pua onaona o ka honua. E o! He lono nui loa keia a he mea keia a kakou e hoopau ai. Oia hoi ka puni laau ona poaka. He mea poino keia a he mea keia e kaapuni nei a puni o Hawaii. Nui na kanaka i puni i keia laau a ina aole e hoopauia, e puni ana na kanaka hou ae he nui wale.
O ka lono i luhi mai nei keia, oia hoi ke kuaiia ana aku o ka laau ona poaka e kekahi lala o ka hui mele o B.E.T., oia hoi o Joe Daniels Jr. Tsa, hoka!
Wahi a ke aupuni pekelala, ua hopuia elua pahu pepa e lakou ma ke kahua hoolulu mokulele o Honolulu, a aia ka laau ona poaka i loko. E pae ana ia mokulele ma hope o kona lele ana mai Los Angeles mai. Wahi a lakou, aia he kanalima paona o keia laau ona i loko o na pahu. Ua hookoloia keia mau pahu e na makai a ka hale i hoounaia ai. Laweia ae la na pahu i ka hale o Joe Daniels Jr. ma Royal Kunia. Aia o Joe Daniels Jr. ame elua kanaka mai Kaleponi mai ma kona hale. Wahi a Daniels Jr., aole nana kela pahu. Na kona hoa lumi ia.
Ua hoopaahaoia lakou e na makai. I keia manawa aia lakou ma ka hale o ke aupuni pekelala ke kali nei o ke komo ana i ka aha kolokolo pekelala.
Aue no hoi e!
He mea nui keia no ka mea o na mea hookani pila o B.E.T., he mau mea lakou a na keiki e mahalo aku ai no ko lakou makau hookani pila. Makemake na keiki e lilo i hookani pila aka ke puni nei na mea hookani pila i ka laau ona. Ina hoi ha pela, e puni ana no paha na keiki i ka laau ona poaka. Pehea e hooponopono ai?
He mea poino ka laau ona poaka. Hele paha a pupule na kanaka i ka ai ana i keia ano laau, a i ka nui o ka manawa aole hiki ke hoi mai.
I na ohana apau,
aia he hookahi kanaka i puni i ka laau ona poaka. Pela no ko'u hoahanau. I ku'u wa kamalii, he keu kona maikai i ka heenalu ana. Malia e lilo ana oia he heenalu oihana. I ka piha ana ia ia he umi kumakahi makahiki, hoomaka iho la oia i ke puhi ana i ka pakalolo. He mea maamau ia ia keia puhi ana aka nae, hoomaka koke kona mau hoa i ke puhi ana i ka laau ona poaka. A ua hahai oia ia lakou a lilo i ka laau ona poaka. I keia mau la, aole maopopo ia makou kahi ona e noho nei, aole no hoi maopopo ina ke ola nei oia. Ke aloha no.
© 2008 . Koa Merino
