Welina ke aloha e na kupa o ka aina o Hawaii. He hale no ka aina no na kanaka Hawaii ma muli o ko kakou pilina me ia wahi. Mai ka wa o Wakea laua o Hoohokukalani ame Haloanakalaukapalili, he pilina kupaianaha keia ma waena o na kanaka Hawaii ame ka aina ame na akua. I keia mau la, lehulehu na kanaka ma Hawaii nei i kapaia he mau kanaka "hale ole." Ke noho nei no keia mau kanaka ma na paka, ma kahakai, ma lalo o na alaloa, ma hope o na hale kuai, a pela wale aku. He ano hale keia, aka he hale kaupoku ole; aohe o lakou hale maamau. I keia wa, pipii loa ka hoolimalima ana i hale. No laila, e nana pono kakou i ka manao o ia mea he "hale ole," a i ke kumu hoi o ka pilikia, oia ka paakiki o ke kuai ana o na kanaka Hawaii like ole i hale i Hawaii nei.
Wahi a ka Home Price Comparison Index (HPCI) a Coldwell Banker no ka makahiki 2007, ma Honolulu e ukuia ai ka ma kahi o $843,750 no ka hale. Hu ka pipii! Aole hiki i ka hapa nui o na kanaka Hawaii ke uku i kela mau kala he nui, no laila, ikeia ka nui ana mai o na kanaka e noho hale ole ana. Noho ia mau kanaka i na keena noho a i ole i ka hale i malamaia e ka mokuaina o Hawaii. I kekahi manawa, i ka wa popilikia o ia mau poe, hoomaka lakou i ka ai laau ona. Aue no hoi! A laila, kipakuia na kanaka hale ole e nee i o a i anei a na lakou e imi i wahi hou e noho ai, aka, aohe wahi a lakou e komo ai, a laila nee ia mau kanaka i kahakai a i ole i kahi e ae. Oia ka pilikia nui.
I keia manawa, he manao ko ka mokuaina o Hawaii e kipaku i na kanaka apau e noho nei i kahakai, no ka mea, manomano na kanaka o laila. A, ke hiki mai ka malihini, puiwa ae la oia. I ko lakou manao, na lakou ka aina i hiki ke hoonanea a hoomalie ma ka huakai. Ke namunamu lakou, o ka imi aku la no ia o ka mokuaina i mea e hauoli ai na malihini, no laila, kipakuia na kanaka Hawaii, i "hoonaninani" ia o kahakai. Ina makemake ka mokuaina o Hawaii e hoonee i ia mau poe, na lakou ke kuleana e malama i ka poe hale ole, a loaa he wahi a lakou e noho ai. Ma Oahu nei, loaa umi kumakolu mau hale e malamaia ai na kanaka hale ole. Kakaikahi nae ka poe i hiki ke komo no ka mea, liilii wale no ka hale a piha no i na kanaka. Aia ka hapanui o ia mau hale i kahi kokoke i Honolulu, aka, aia nae ka hapanui o ka poe hale ole ma Waianae. Hoonaukiukiia ka poe hale ole ke kipakuia no ka mea, pono lakou e malama i ka ohana a paakiki ka nee ana o ka lakou mau keiki. A laila, hoonaukiukiia ka poe hale ole ame ka mokuaina no ka mea aole i pau ka pilikia.
He haina moakaka no ka'u. Pono e kukuluia na hale hou e malama i na kanaka hale ole. Mau no ka pilikia o ka liilii o na hale e ku nei, no laila, pono e kokua i ia mau kanaka. I nani paha ka hale a he wahi palekana ia no na keiki, na ohana, ame na mea waiwai a ka poe i lawe ai, malia paha, e eleu ana na kanaka e komo ma loko. I kekahi manawa, aole lawa na lima hana e malama i ka mea ai o ia mau wahi, no laila, e kokua kakou. He ohana no na kanaka hale ole no kakou, no laila no kakou paha ke kuleana e malama ai ia lakou. Hiki ia kakou ke hele ma ia mau hale a hoomoa i ka meaai na lakou. Ke hana kakou penei, e lilo ana kakou i kumu alakai i hiki ia lakou ke holomua. I laulima no kakou apau a malama kekahi i kekahi, hiki i ka lahui ke ku me ka ikaika ame ka haaheo. O keia ko kakou aina hanau, ko kakou home, no laila, e kukulu kakou i hale maikai.
© 2008 . Sanoi Peahu
