Ano ai ke aloha e ka poe oiwi mai ka a enaena o Kilauea a i ke kai nalunalu o Lehua. Ku kakou i ka wa popilikia i lilo ai na paoihana Hawaii i na paoihana e. Pii ae la ke kala e uku ai no ka noho ana i Hawaii nei a akole mai la ka hapanui o na paoihana ma anei. Hoehaia ia mau paoihana ke uluahewa na paoihana mai ka aina e me he laau hihi la. I kuhaluka na paoihana e, aohe wahi no ia mau mea i kamaaina ia kakou, a o ke kipuka iho la no ia. Oiai ke holomua nei na hui i kukuluia ma ke kahua nui o ke kala, piholo na hui i kukuluia ma o na pilina o na kupa o ka aina. Pela i pilikia ai ka paoihana mokulele o Aloha.
Pau iho la ia hui i kekahi pule aku nei ma hope o ka wa elua o lakou i piholo ai i ka panakalupa. Kukuluia ia hale ma kahi o kanaono kumakahi makahiki aku nei. I ka pau ana o ia hui, ku ma kahi o hookahi kaukani eiwa haneli mau kanaka i ka hana ole. He wa popilikia ia no lakou apau, no ka mea, puka ae la ka leka e hookuu ana ia lakou he elua wale no la ma mua pono o ka pau ana. He elua wale no la o lakou e hoomakaukau ai no ka hana ole a e imi ai paha i oihana hou. He panai kupono ole keia i ka hana nui a ia mau kanaka i kupaa ma hope o ka hui Aloha i ko ka hui wa popilikia. He ohana nui ia hui a me he mea la, okiia ia pilina me na makua ke pilikia laua.
Piholo ia hui no ekolu mau kumu nui. Akahi, ua oili mai kekahi paoihana mokulele hou, oia hoi o go! He lala o go! no ka hui mokulele nui o Mesa ma Amelika. Waiwai no ia hui e, no laila, hoomaka lakou i kekahi hookuku uku emi. Pilikia koke na paoihana apau i ia hookuku, no ka mea, hoemiia ka uku likiki a go!, a hoao na hui e ae e hana like, o ka hoemi ihola no ia i ka uku likiki a na hui apau. No ka waiwai lua ole o Mesa a me go! pilikia ole lakou, aka, hoehaia ko onei mau hui. Alua, ma muli o ke kaua ma Ilaka, ke pii nei no ke kumu kuai o ke kakolina a pipii launa ole. Pau ma kahi o eiwa kaukani paona o ke kakolina i hookahi mokulele i hookahi hola. Hu ka lehulehu o ia paona kakolina! Oia ka mea nui i ukuia e ka hui mokulele. Akolu, ua emi ka waiwai o ko Amelika i keia manawa no ka pipii o ka noho ana ame ke emi ana o ka hoolilo kala ana o kanaka. Ma muli o ia emi ana, kakaikahi na likiki mokulele i kuaiia aku.
Malama ka hookele waiwai o Hawaii i elua wale no paoihana mokulele. Ke komo kekahi hui ekolu, piha no hoi, a o ka pauia ana o hookahi hui ka hopena e alo ole ai. He laana kupono ke komo ana o ka hui o Mahalo. Pau koke ia hui ma hope pono o ko lakou komo ana i ka hiki ole i ka hookele waiwai o Hawaii ke kakoo. Aka, i keia manawa, oi ae o go! ma mua o Aloha ma muli o kekahi hana hoopunipuni a lakou. Ma mua ae nei, noi o Mesa, ka hui makua o go!, i na palapala oihana o ka hui Aloha. Aka, i lawa no a haawiia na palapala ia Mesa, lilo no ia ia lakou, a hanauia mai la ka hui o go! Hoohanaia ia mau palapala i hoomaikaiia o go! Pono ole ia hana a no lakou no ka hilahila.
Wahi a ka lohe, hoonuiia na kanaka e naiaumi i ka hui o go! a kakoo wau i keia hana. Na kakou, na na kanaka o Hawaii, e malama i ko kakou mau ohana, a i na oihana kekahi. E hoike maoli kakou i ko kakou mahalo ole ia go! ame ko lakou hoopunipuni hoopalai maka. Ke hui pu kakou, malia paha, kipakuia o go! a hiki paha ia Aloha ke komo hou a hoomau i ka lakou malama ana ia kakou. Eia ka'u noi ia oe e ka mea heluhelu, e ku like kakou a kue no hoi i ia paoihana e.
© 2008 . Iokepa Gomes
