Malama i ka aina! Malama i ka aina! Malama mai la ka aina ia kakou! E na pua a Papa ame Wakea, e malama i ka aina! I ka helu elua o Ka Ulu Hoi, weheweheia aku la na pilikia o ka nui opala ma ka mokupuni o Oahu. Aia ka pono o ka hoopoaiapuni ana a kakou i kela me keia la. Nui ka opala ma keia aina ame na aina like ole o ka pae moku o Hawaii. No laila, eia kekahi haina e kiloi pono ia ai ka opala. E hoomaka kakou i ka hoopoaiapuni ana i na mea ulina, na omole aniani, na nupepa, ame na mea apau i hiki ke hoopoaiapuniia.
Ma Mililani ame Maunalua ma ka mokupuni o Oahu, loaa ka curbside recycling a ka Meia Mufi Hannemann ma i hoomaka ai. Ua hoouna pakahi ia ekolu kini i ka poe o Mililani ame ka poe o Maunalua. O ke kini eleele, ke kini uliuli, ame ke kini omaomao na kini i loaa i ia poe kanaka. I ke kini eleele e kiloiia ai ka opala like ole, he kawele pepa, he mea ai pilau, a pela wale aku. I ke kini uliuli e kiloiia ai na mea ulina, na omole aniani, na nupepa, ame na pepa manoanoa. Aka, aole hiki ke hoopoaiapuniia na ulina apau. Ina makemake e hoopoaiapuniia na mea ulina, aia ka pono o ka loaa ana o na kanawai ulina helu 1 a me 2. E hooiaio ma lalo o ka mea ulina, kahi e loaa ai ka helu kupono. A i ke kini omaomao e kiloiia ai na laau ame na mea kanu. Aka nae, he aha ka hana o na poe kanaka e noho ole ma keia mau wahi. Ina o oe kekahi e noho ma kahi okoa, e imi i papa kuhikuhi hoopoaiapuni no ka aina au e noho ai i mea e hoonaninani ai i ka pae aina, mai Hawaii a Niihau.
E ka moku o Manokalanipo, e hoomaka hou i ka hoopoaiapuni ana ma Kauai Research Center ma ka aoao o ke kahua hoolulu mokulele. Hiki ke kiloiia na mea ulina, na ano pepa like ole, ame na ipu aniani ma loko o ka pahu kupono. Ina i ka aina o Kauai kou one hanau, e nana paha oe i ke kahua punaewele o Recycle Kauai no ka ike o laila.
E ala mai e ke one o Kakuhihewa. Hiki ia oukou ke hoopoaiapuni! Aia ma ko oukou aina ka hui o Oahu Community Recycling (OCR). Ina noho ole oe i Mililani a i Maunalua paha, e noi i kini mai ka hui OCR. E hoouna lakou ia oukou i elua kini: hookahi kini no na nupepa, na pepa lolo uila, ame ka pepa manoanoa. I ke kini e ae e waihoia ai na omole aniani, na kini aluminuma, ame na mea ulina.
Ma hope o ka hoopoaiapuni ana a oukou, e kii ia na kini e ke kalaka halihali a OCR a e hoomau no i ka hoopoaiapuni ana.
E na moku o Kama, o Hina, o Kaululaau, hiki no hoi ia oukou ke hoopoaiapuni e like me na poe hanau o Kauai. E malama i ka aina, a laila, e hele i na waihona opala like ole i mea e kiloi ai i kau mau opala no ka hoopoaiapuni ana. Ina makemake oe e hana penei, o nana i ke kahua punaewele: Recycle Maui. I laila e weheweheia ai ka alemanaka no ka hana ana o na hui like ole, ka mea a oukou e hoopoaiapuni ai, a pela wale aku.
E o mai oukou e ko ka aina kuauli o Keawe! E hoopoaiapuni kakou. E hele i kekahi waihona opala a hookaawale i ka opala i ekolu puu; hookahi puu no na pepa like ole (he nupepa, he pepa lolo uila, a pela aku), hookahi puu no na mea ulina, a hookahi puu no na mea aniani. Ma hope o keia, e kiloi i na mea i hookaawaleia i loko o ke kini kupono. Ina makemake i ka ike apau, e nana i ke kahua punaewele: Recycle Hawaii. Ma keia kahua punaewele e weheweheia ai na hana hoopoaiapuni. Nui na Oihana Non-Profit e kakoo i ka hoopoaiapuni ana. No laila, ina kakou e kakoo a kokua ia lakou, e hele a momona ka aina.
E ka Hawaii, loaa ka hale hana Garbage to Energy i ko oukou aina. I ka nupepa nui o Honolulu Advertiser i weheweheia ai ke kukulu ana i ua hale nei. Kukuluia ae la keia hale hana ma ka aoao o ke kahua hoolulu mokulele o Hilo. Ma ka hale hana Garbage to Energy, hiki ke hoa ia 250 kana o ka opala, oia hoi ka 40 pakeneka o ka opala a ka poe o Hawaii. No ka heluhelu ana i kekahi moolelo e wehewehe ana i ia hale, e nana i ke kahua punaewele: Honolulu Advertiser i ka la 3 o Malaki i ka makahiki 2008.
E na pua a Papa a me Wakea, mai lilo i kanaka no Kukii mai. E hana no, e hoopoaiapuni, e malama i ka aina. Ua hanaiia kakou e ka aina, no laila, e malama no hoi kakou i ka honua.
© 2008 . Kamuela Kaapana
