I keia au, ke nanea nei kakou i ke ea oluolu o ka makani e ani nei, hiki ke hanu i ka mauli ola. No ka mea, kau mai la kekahi mau kanawai hou e pili ana i ke puhi paka ana. I keia mau la aole hiki ke puhi paka i loko o na hale oihana a hoomaluia no hoi kahi kokoke i na puka komo ame na puka aniani o na hale like ole. Aka, ke mau nei no ke puhi paka ana ma na wahi e ae. Eia nae, ma na wahi apau, aole hiki ke puhi i ka pakalolo me ka ole o ka laikini i haawiia mai e ke kauka. Oi aku paha ka nui o na pilikia e loaa ai oe ke oe puhi i ka paka ma mua o na pilikia e loaa ai ke puhi pakalolo, aka ku ke puhi paka i ke kanawai, a pono ka laikini e puhi pakalolo ai ma na wahi apau. Ke noonoo au, ano e keia mau kanawai.
E na hoa makamaka e heluhelu nei, mai no a noonoo he moolelo keia e koi i na kenekoa ame na kanaka kau kanawai e apono i pila e ae i ke puhi pakalolo ana. Aohe o'u puhi i ka paka a i ole ka pakalolo, a aole au makemake e hana pela, he mau manao wale no ia. Ke hoao nei au e hoike aku i na mea hupo o ua mau kanawai. No ka mea, ina ku ole ke puhi pakalolo ana i ke kanawai, pela no hoi ke kanawai no ke puhi paka ana.
E nana mua kakou i ke puhi paka ana. Nui na mai okoa e loaa ai oe, a he mau ano mai aai hoi ka hapanui. I loko o hookahi kikaliki, loaa na kemika ino loa he nui wale, a ma muli o keia mau kemika, aole wale no e hele a mai, aka hiki ke make i ke puhi paka ana. Eia kekahi, ke puhi paka kekahi, hoopilikiaia kakou apau. Oia no ke kumu i hookumuia ai ia kanawai hou e papa ana i ke puhi ana i kahi kokoke i na puka. I loko o ka uahi wale no, loaa kekahi mau laau make; o ka benzene oe, o ka arsenic oe, o ka cyanide oe, a ia mea aku, ia mea aku e make ai oe. Aole keia he mau ike pili hou aku. Maopopo ia kakou na pilikia o ke kino ke puhi paka ke kanaka, aka he mau manao keia e noonoo ai kakou.
Aia he hoolaha hou ma ke kiwi na kela hui maikai wale o Truth. Ke nana au he akaaka wale no ko'u. He ano hanakeaka keia mea hou ke nana aku: e himeni ana elua mau opiopio e pili ana i ka oihana "Big Tobacco" ame ka "magical amount." Wehewehe mai la lakou i na mea o loko o ke kikaliki, a wahi a lakou, lawa ka nicotine i mea e hoohei ai ia oe no ka manawa loihi, aka aole lawa ka nicotine e make ai oe, oia hoi ka "magical amount." Ma muli o keia "magical amount," haawiia aku kau kala i na ahahui i kapaia o Big Tobacco i mea e hooko ai i kou iini. Akamai lakou, ea? Hiki ke ikeia keia hoolaha ma www.thetruth.com. Aole paha nui ke aloha o ka Big Tobacco i ka hui o Truth, ALOHA INO!
O ke puhi pakalolo ana nae, he ano mea ia e hoonanea a hoomalie ai. I loko o keia ano kikaliki, aia hookahi mea, oia hoi kahi mea no ka honua mai, he ano lau wale no. He aha ka pilikia? Like no ka hopena o ke puhi ana i ka pakalolo me ka inu pia ana. A aole keia he mea maikai, aka, he mea keia i hiki ai i na makua ke hana me ka ole o ka nanaia ana.
He ano lapaau ka pakalolo e polapola ai kakou i na ano mai he nui: o ka nausea oe, o ka spasms oe, o ka arthritis oe, o ka glaucoma oe, a pela aku. Ke hoole nei kakou i kekahi mea kokua, kekahi lapaau hoi, aka, ke ae nei kakou i kekahi mea hoomake. Pehea kou manao, e ka makamaka heluhelu?
© 2008 . Kaikaina Kekua
