He aha ia mea he iPod? Nui ino na kanaka e hoohana i keia mikini liilii ma ka papa a ma waho o ka papa. He makepono no ke kuai ana a he waiwai ka loaa ana o ka iPod ma muli o ka hiki ke lohe i ka'u mau mele punahele i na wahi like ole. He keu a ke kupanaha ua wahi mea a'u e hoohana ai i kela me keia la. Auhea oukou, e ka poe i ono i ka ai o ka mala i maona ai i ka opu. Eia ka hoopuka manao a ka mea kakau e hoolale ai ia oukou i ke kuai ana mai i ka iPod.
Eia kakou i ke au o na enehana i kupu ae nei i mua o ko kakou mau maka a o ka iPod kekahi o kela mau enehana e hoohanaia nei e ka poe he nui. Eia kekahi moolelo hoihoi. Aia aku nei au i ke kaona, a ikeia he kanaka ilihune i komo i loko o ka hale aina o McDonalds i ke aumoe me kana iPod e paa ana i kona lima. Ia'u i ike ai i kana mea, o ko'u puiwa maila no ia i ka loaa ana o kahi iPod i kona lima, me kona aahu ana no i ka lole kahiko . No laila, kuhi au ua aihue paha oia i kela mea. Niele aku au ia ia ala, a ua kamailio maua no ka manawa loihi. Hoike mai oia i ke kiionioni ana i hooili ai ma kana mea ame na mele i loaa ia ia. Pehea la? Loaa keia mea i ka po.
I keia la, nui na kino o ka iPod: o ka iPod shuffle oe, o ka iPod nano oe, o ka iPod classic oe, o ka iPod touch oe, a ia mea aku. O ka iPod touch ka mea hou loa i keia manawa. O ka iPod shuffle, oia ka mea liilii loa, ka mea nona he hookahi a i ole elua ai papiliona. O ka iPod nano, hiki ke nana i na wikio ma luna o ia mea a loaa he eha a i ole ewalu ai papiliona. O ka iPod classic, loaa he kanawalu a i ole hookahi haneli kanaono ai papiliona, no laila, nui na mele e hooili ai ma luna o nei iPod a pela pu no me ke kiionioni. O ka iPod touch, like loa kona kino me ka iPhone a o ka nui, he ewalu, umikumaono, a i ole kanakolu kumalua ai papiliona.
Aia no hoi he polokalamu i kapaia o Podcast i hiki ia oe ke oki leo a hoolele ma o ka punaewele! I keia kau, e hoomaka ana ka polokalamu a'u e hana nei ma Leeward Community College e hoohana i keia mea hou i mea e kamaaina ai ka enehana o keia au i na haumana. Oiai ko'u kaikaina i komo ai i kana papa hookele oihana ma LCC, hoopaaia na hai olelo a ke kumu ma o ka podcast a ina loaa ka iTunes, hiki ia oe ke hooili i na hai olelo i luna o laila. No ia papa, he koina ka loaa ana o ka iTunes aka, o ka iPod, aole ia he koina, he koho wale no. I ka wa e hiki mai ana, e koiia ana paha ka iPod. Malia paha, he mea pono ka iTunes, ina makemake oe e hooili i na haawina i luna o kau lolouila. Aole kamaaina loa keia hana iau. Mau no ke ao ana i keia mea oia hoi ka Podcast. He mea kupanaha keia hana hou a makemake au e hele a maa i keia enehana.
Pipii hoi ka iPod, aka, he makepono no ke kuai ana mai i keia mea. O ka iPod shuffle ka mea emi a o ka iPod touch ka oi loa o ke kumu kuai, aka, ia oe e kuai mai ai i ka iPod, e maopopo ana ka waiwai o keia mea ia oe. He mea kupanaha hoi keia a ke hoololi nei keia i ke ano o ke ao ana ma o ka hooili ana i na hai olelo no kekahi papa, ka malama ana i kau mau mele, a pela aku. Aka pehea keia hana apiki? Ke komo oe i ka papa, e maalahi ana ka huna ana aku i kau iPod ma kou lole ame ke kau ana i ke apo lohe i kou pepeiao. Oiai ke kumu e olelo ana, e hoike i kou maka i ke kumu, me he mea la e maopopo ana ka haawina ia oe, aka o ke mele kau o ka hoolono ana.
Mai kali a pau na niho o hala e ka Puulena, e kuai oe i iPod.
© 2008 . Ikaika Lum
