I kela me keia makahiki, make iho la ma kahi o 5.4 miliona mau kanaka i ke puhi paka. Oleloia, e make ana 6.5 miliona mau kanaka i ka makahiki 2015 a pela no he 8.3 miliona mau kanaka i ka makahiki 2030 i ke puhi paka ana. Ke pii nei no ka helu o na kanaka e make nei. Wahi a ka World Health Organization, i kela me keia 6.5 kekona, make iho la kekahi kanaka i ke puhi paka. I keia makahiki, he 438,000 ka huina o na kanaka Amelika e make i ke puhi paka. A e make ana he 50,000 mau kanaka hou aku i ka uahi a na kanaka e ae e puhi paka ana. He pilikia keia! O ke oki ana i ke puhi paka ka hana e pono ai…i KEIA MANAWA ANO!!! Ke eha nei na keiki i ke puhi paka a na makua. Pono kakou e hoomalu ia lakou, i na liko hoi o Hawaii.
Nolaila i loaa ai he kanawai hou i na mokuaina o Kaleponi, Akanaka, Luikiana, me Pokoliko ma Amelika. O keia na wahi e hiki ole ai ke puhi paka iloko o ke kaa ina aia kekahi keiki iloko o laila. Ina ikeia kekahi kanaka e puhi paka ana iloko o ke kaa, a aia kekahi keiki iloko, e hookuia oia e ka makai, a kikikiia oia. I keia manawa, o Waikinekona kahi wahi e koho ana i ka pono me ka ole o keia kanawai. Malia paha i kekahi la kokoke, e koho o Hawaii i keia kanawai.
Penei na kanawai e ku nei i keia manawa. I ka makahiki 2001, ua papaia aole e puhi paka iloko o ka hale aina. I ka makahiki 2006 ma Amelika, ua papaia aole e puhi paka malalo o ke kahua kaaahi i uhiia. A i kela makahiki aku nei, papaia aole e puhi paka iloko o ka hale inu pia. He mau mea kupono keia e malama i na kanaka e puhi paka ole. Nolaila, ina aole aeia ke puhi paka iloko o ia mau hale no ke ola pono o na kanaka e puhi paka ole, pehea ke puhi paka ana iloko o ke kaa? Pono kakou e kakoo i keia kanawai ma Hawaii nei a ku like me ko Akanaka ma. He kanawai maikai loa oia. Pono ia kakou ke malama i ke ola kino o kanaka i kela me keia wahi a i kela me keia wa.
O keia ka mea nui, aole hiki i na keiki, na kamaiki, ame na kanaka e puhi paka ole ke pakele i ka laau make o loko o ka uahi puhi paka ke kau pu i ke kaa. Like ka uahi iloko o ke kaa me ka uahi iloko o ka hale inu pia, a ua loaa no he kanawai e malu ai ka hale inu pia. Pehea kela? He hana maikai loa keia no ka hoomalu ana aku i na keiki ame na kanaka apau. Nui na mea e pilikia ai na keiki i ke puhi paka ana o na makua, oia hoi, liilii ka pepe i ka hanau ana, e make emo ole paha, pilikia ka lolo ame ka noonoo ana, loaa paha i ka hano, a pilikia ke olakino ke oo oia.
Ma o keia mau mea i oleloia, hiki ke ikeia, he mea maikai ole ke puhi paka ana. Pono ia kakou ke malama i ke ola kino o kakou. Nui na hana e hemo ai keia pilikia. Aka, o ka haina nui, uoki ke puhi paka ana! He mea maalahi ia. Ina haalele na kanaka apau i ke puhi paka ana, aohe pikilia. Ma Kahi O ka Makani e Pa ai, Malaila ka Uwahi e Hina Ai. Ina e puhi paka oe i kahi kokoke iau, puhi pu wau i kau paka. Elua a'u haina, MAI PUHI PAKA! E OLA MAU!
© 2008 . Sanoi Peahu
