Aloha mai e na pua o ka pae aina o Hawaii a Hauoli Makahiki Hou! I ka wa hoomaha nei, ua hoonua kakou, inu nui kakou, a hoonanea kakou, nolaila, pehea mai nei kou kino i keia manawa? Ua nui anei kou opu? Pehea kou manao no ka pono o ke ola kino o kakou? He maikai kela, aole anei? E hoomaka kakou i ka hooikaika kino ana, ka ai pono ana, ame ke ola hou ana.
I ka wa kahiko, ola maikai ka poe kanaka. Ua hoonua lakou a nanea lakou, aka, ua maikai ke ola kino o lakou. Heaha ka lakou mau mea huna? O kekahi, ua hana lakou i kela la me keia la. Ua hana kekahi kanaka maloko o ka loi, i ka lawaia kekahi kanaka a ua kuku na wahine i ke kapa a pela aku. Nui ka hana like ole o ka wa kahiko, aka nae, aole maikai loa ke ola kino o na kanaka i keia wa. No ke aha? I keia wa, aole holoholo na keiki i na wahi like ole. Makemake lakou e noho maloko o ka hale a paani i ka Wii, ka Xbox 360, a nana i na kahua punaewele o PukeMaka a me Ko'uWahi. Aole lakou hooikaika kino, ea? A, o na makua, aohe o lakou manawa kaawale, nolaila, aole lakou e aa i ka holo wawae ana, i ka paani ana me ka lakou mau keiki, a pela aku. He aha la?
He hapalua hola wale no o ka hele wawae ana e pono ai i mea e hooikaika ai i ka puuwai ame ke kino, wahi a ke kahua punaewele o www.mamashealth.com. Ina aole oe makemake i ka hele wawae ana, e komo i ka hale hooikaika kino. I keia wahi e loaa ai ka hana e lawakua ai kou kino. Nui na ano hana like ole ka hapai paona, onilele, a pela aku. Wahi a ua kahua punaewele nei, hala 30 la, a maa ka hana ia oe. Ina aole oe makemake i keia mau hana, e hana i kou hana hooikaika kino punahele. E heenalu paha, e auau kai, e paani kinipopo peku, pohinai, a pela aku. Nolaila hiki ke hooikaika kino a lealea ka hana.
O kekahi mea nui, mai hana hookahi oe. E hana oe me kou ohana, kou mau hoa aloha, a pela aku. E koho i ka la a oukou e hui pu ai a e hana no! Noke i ka hana!
Aka nae, ina aole hiki ke hahai i ua olelo hoohali nei, e hana paha e like me keia. No na haumana e hele i ke kulanui, e holo paikikala i ke kula ina noho oe i kahi kokoke. I ko oukou hele wawae ana i ka papa iluna o ka ha o ka papahele, mai kau i ka eleweka, e pii ae i ke alapii i mea e hooikaika ai i kou wawae, i kou kino, ame kou puuwai. Aka, ina aole hiki ia oe ke pii iluna o ke alapii, hiki paha ke iho ilalo o ke alapii, i mea e hooikaika ai ma kekahi ano.
Maikai ka hooikaika kino ana, aka nae, ina oe e ai pono i ka wa o kou hooikaika kino ana, ua hemolele i ka malie! E malama oe i kou kino ame kou naau. Nolaila, e ai i na mea ulu ame na hua ai like ole. E ai i ka noni e hoemi ai i ke koko pii, ka naokoko, a pela aku. Ina oe e ai i ka mikana, hiki i kou kino ke pale aku i na ano like ole o ka mai aai. Mai poina, hiki ke ai i ka io pipi i wiliia, ka pai pika, a pela aku, aka, mai ai i ia mau mea he nui!
Nolaila, e ai pono kakou, e hoikaika kino kakou, I lohe i ka olelo a hooko, e ola auanei a laupai. (ON# 1229)
© 2008 . Kamuela Kaapana
