Auhea oukou e na hoa hookoa. Mai ka mokupuni o Hawaii kuauli a hiki i Niihau o ke one pupu o Kahelelani, ke aloha no kakou apau. E hahai kakou i na hana ame na ike a na kupuna i aloha nui ia a e hooku i ka nome ana i ko kakou aina aloha.
Ua ike kakou i ka aaiia ana o ka aina ma Oahu. Kukuluia na hale nui ame na hokele a nee mai na haole mai ka aina e mai. Ma o keia hana, ke aaiia nei ka mokupuni o Oahu. Ua nui ae ka poe e noho nei ma keia mokupuni a ua pihakui ka mokupuni i na kaa, na hale, ame na halekui. He aina nani no ko ka mokupuni o Oahu, aka no nae ua hoopupukaia ka aina e ka poe. Oiai aole na na kanaka wale no e aai ana i ka aina, na ka manao haole nohoi ka aai ana i ka aina.
Oiai i ke au o ko kakou mau kupuna, nui ko lakou aloha i keia aina aloha. Nui ko lakou hoihi i ka aina a i na mea ola apau. Ua malama maikai na kupuna i ka aina, no ka mea na ka aina e malama a hanai ia lakou
I keia mau la, aohe malama, aohe aloha o kanaka i keia aina o Hawaii nei. Ma Oahu, nui na kanaka e malama ole i ka aina. Ike pinepine ia ka opala ma kahakai a ma ka aina. Nui ko'u hopohopo no na mokupuni mawaho aku o Oahu, no ka mea, e like ana na mokupuni e ae me Oahu. Aue ka hoi e!
Eia hou no kekahi, ke kuee nei kakou i ka hoopoina ana i ka manao o ko kakou poe kupuna. Ua laha na mea ame na manao o ka Haole i keia au. O kekahi laana, oia hoi ka Superferry. He mea keia a ka Haole, no ka mea aole nanaia ka pono o ka aina ame ka pono o na mea ola o ke kai. Nana wale ia no ka pono o ke kanaka. Makemake wale ia no ka mea e maalahi ai ke ola o na kanaka. A nana nui ia ka mea i hiki ke ulu a nui ae ka puu kala a ka poe Haole me ka nana ole i ka pono o ka aina, ke kai, ame ka poe e ae. O kekahi hopena o keia Superferry, oia ka paa ana o ke alanui. Ua paa na alanui o Oahu i na kaa a e paa ana na alanui o na mokupuni e ae i na kaa o Oahu. He kuleana ko kakou e hooki ai i ka hoomau ana o ka manao Haole i ke kukulu ana ma Hawaii nei.
O ke kuleana o ke keiki hanau o Hawaii nei, oia ka malama ana i ko kakou one hanau. No keia hanauna ke kuleana e alakai i keia lahui i ke ala pono. Nolaila he leo paipai keia no keia hanauna e makaala i ka aaiia ana o ko kakou aina a e hooku i keia hana. E kue kakou i ka hoomohalaia ana o ko kakou aina.
E huliamahi no kakou no ka pono o kakou ame na pua e hiki mai ana!
© 2008 . Kalauihilani Robins
