Aloha mai e na hoaaina mai ka mokupuni o ka liko lehua a i ka mokupuni o ka mokihana. Wahi a kupuna: He alii ka aina; he kauwa ke kanaka. O ka manao o keia olelo noeau, he mea waiwai loa ka aina, no ka mea, aia ke ola ana o kakou a malamaia ka aina. Na ka aina e hanai i na kanaka ame na holoholona like ole. Aohe ai a kanaka ina ua pau ka pono o ka aina. Ina aohe o kakou aina aole hiki ia kakou ke ola. He kauwa kakou, no ka mea, e malama no kakou i ka aina. O ko kakou kuaana ka aina. Ua poina paha ke kuaana ia kakou? I kela me keia nupepa, aia he moolelo no ka malama ana i ko kakou kuaana. Malia paha, ua hoomaka kakou apau e malama i ka aina a kakou e noho nei, aole paha. He kuleana nui ko kakou e malama ai i ka aina e hanai ia kakou, i na pua.
E na pua o ka aina eleu paha kakou i ka heluhelu ana i na moolelo he nui e pili ana i ka malama ana i ka aina. Makemake kakou e kokua i ka aina mahope o ka heluhelu ana i na moolelo, aka, moloa mai la kakou. Nui ka hana o ke ola, a poina koke ka kakou eleu. Nui na mea liilii i hiki ke hanaia no ka malama aina. Ina hele oe i ke kula, hiki ke hui pu me kou mau hoa a hele pu i ke kula ma hookahi kaa. Hiki ke malama i ka aina ame kau kala kekahi! Hiki ke hele wawae a i ole, holo i ka paikikala ina oe makemake. A pela e malamaia ai kou kuaana ame kou kino nohoi.
E malama no na kaikaina i ka aina no ka mahi ai ana, aole no na hale wale no. Hiki ia kakou ke kokua ma o ke kuai ana mai i na mea ai mai na mahi ai o Hawaii nei. Aia he mau mahi ai e hele mai i keia kula nei o Hawaii ma Manoa, i na hale pule, ame na wahi like ole; e kuai paha i kau mau mea ai maia lakou mai. Oi aku ke kuai ana i ka lakou mau mea mamua o na hale kuai maa mau. He kokua nohoi keia, no ka mea, e mau ana ka aina mahi ai i ia ano kakoo. A loaa no na aina hooulu mea ai, aole wale no o ka aina nui o ka hale. Hiki nohoi ia oe ke ninau i na ninau like ole, i ike oe i na mea i ulu ai ka lakou mea ai. Ina hoohana lakou i na laau make haipilikia, aole paha kela he mea kupono.
E na hoa kula, eia kekahi kokua nui, e hele oe i ka hale waihona puke ma kahi o ke kuai ana mai i na puke he nui, no ka mea pela e make ai na kumu laau he nui. Minamina no, he mea waiwai no ka hale waihona puke. A ina hoihoi oe i na puke i ka manawa kupono, manuahi ka hoaie ana.
Eia kekahi hana maalahi loa e kokua ai i ka poe kuai hele – e kuai i na mea i hoohana e ia. Kaulana no o Craigslist.com i ia ano kalepa. Malaila e kuaiia mai a kuaiia aku ai na mea hou ame na mea kahiko. Ina kuai oe i na mea i hoohana e ia, he kokuaia i ka aina, no ka mea, aole kakou hoomaunauna i na mea e hiki ke hoohana hou ia. Ina aole kakou hoohana i keia mau mea, aia ana ia iluna o ka aina no ka wa loihi loa. A oi aku ke emi ma Craigslist.com mamua o na hale kuai, nolaila o kekahi hana keia e malama ai i ka aina ame ke kala.
Ina makemake oe e loaa ke kala eia kekahi hana – e hoopoaiapuni i kau mau kini ame kau mau nupepa. Maalahi loa! Nui na hale ame na kaa e lawe i na mea hiki ke hoopoaiapuniia i na wahi like ole. Hiki ke loaa ke kala no ka hoihoi ana i na kini, a he mea maikai loa ia. Aia ma kekahi mau kula aupuni he ano pahu, kahi e hiki ai ke waihoia na pepa ame na mea hoopoaiapuni e ae. E waiho wale i na mea iloko o ka pahu.
He papa helu pokole wale no keia. Hiki ke imiia na mea kokua e ae i na kahua punaewele like ole a iloko nohoi o na puke. E malama i ka aina nou iho a e malama i ka aina no kou kuaana a me kau mau pua. He kuleana ko kakou e malama ai i ka aina no na pua o Hawaii nei. E waiho no kakou i ka honua uluwehi ea, aole he aina maloo. E malamaia ko kakou kuaana, a pela no e hiki ai ke hoomau. E hoomohala i na pua nani koki.
© 2008 . Nohea Kumalae
