Owai ke noho ma ke alanui me ka nui launa ole o na kaa e hiki mai ai i ke kula i ka manawa kupono i mea e loaa kekahi wahi hooku kaa? E ka maka heluhelu, ua hoomaopopo oe i kekahi la au i hele ai i ke kula a loaa ole kahi e ku ai kou kaa, nolaila, ua hoi oe i kou hale? Ua uku oe i na kenikeni au i hoahu ai no ka hooku ana i ke kaa? Owai ke hoomaka i ka la me ka hoka mamuli o ka hooku kaa ana?
E kakau ana wau no ka pono o kakou, oia hoi na haumana o Manoa. O ka hooku kaa kekahi pilikia nui i keia mau la. Aia kekahi mau manao a'u e makemake ai e hoike aku ia oukou. A, eia ka'u kumu e kue aku ai.
O ka mea nui, aole lawa na wahi hooku kaa no kakou apau. Mamuli o ka nui o ka poe haumana ame na kumu e hele mai ana i ke kula nui o 
Hawaii, ua piha koke ka hale i na kaa. Piha ia i ka hola ewalu i ke kakahiaka. Nolaila, aia ka pono o ka hele i ke kula mamua loa o ia manawa. No'u iho, pono iau ke haalele i ko'u hale i ka hola eono i mea e loaa ai kahi hooku kaa. Pono iau ke hele i ia manawa mamuli o ka nui launa ole o na kaa ma ke ala nui, oia hoi, nui ka traffic! He pilikia nunui ia no'u a no na kanaka apau e kalaiwa mai Mililani, ame Kapolei, ame Waianae. O keia kekahi kumu a'u e ohumu aku ai i ko'u hele ana aku i ke kula i kela me keia la. Ua hoomaka ko'u la loihi loa me ko'u puni ana i na kaa he nui lehulehu. He pilikia keia! Hele a ukiuki au. No ka mea, i ka manawa a'u e hiki mai ai i ka papa, maluhiluhi wau a aole hiki iau ke nana aku me ka maikai.
Eia kekahi, i ka hola ehia e hoomaka ai kau papa mua? Aia kekahi mau haumana e hele i ka papa mua i ka hola umikumalua, aka, hoea mai la lakou i ke kula i ka hola ewalu i mea e loaa ai kekahi wahi hooku kaa. Hoomaka ka'u papa mua i ka hola eiwa, aka i ka hola ewalu au e hiki ai i ke kula. Pono wau e kali no hookahi hola. He manawa loihi loa ia e kali ai no ka mea, he pepe ka'u. I ko'u manao, he hoopau manawa keia. Aka aohe a kakou koho. Ina makemake e hooku kaa, aia ka pono o ka hoea mamua o ka hola ewalu.
I ko'u manao, pono e kukuluia kekahi mau papahele hou ma ka hale hooku kaa ano nui ame ka hale ike Hawaii. Oia wale no ka haina! I kela me keia makahiki, komo mai kekahi mau haumana hou a he mau kaa ko lakou. Oi aku ka nui o na haumana hou e komo mai mamua o na haumana e puka aku. I keia wa, aia he 20,006 mau haumana i komo mai ma keia kula, a liilii no na wahi hooku kaa. Hiki ke ikeia ka pilikia!
O kekahi mea nui, oia ka uku hooku kaa. Lilo aku ekolu mau kala i kela me keia la, hele a pipii. I keia kau, ukuia he $2,600 no ka hele kula ana i hookahi kau. No na haumana kanawai, uku aku la lakou i $12,888 no ka hele kula ana i hookahi wale no kau. Pehea? Tsa! He pipii loa keia no kakou. Hiki ke kuaiia mai kekahi kaa no kela ano kala!
Nolaila, e hookomo pu ia ka uku hooku kaa i ka uku kula. Paakiki ka uku ana aku o ka haumana i kela me keia la no kekahi mea e like me ka hooku kaa. Pono iau ke uku no ko'u hale, ka uila, ko'u kaa, ka'u mea ai, ka malama ana i ka'u pepe, na puke, ke kula, ame ka hooku kaa. Poohu ka lae i ka ala. Pipii loa ka nohona ma Hawaii nei. O ka uku hooku kaa, he pulukeke ia! E aho e hooponoponoia keia pilikia o lilo ke kala i kumu a na haumana e hele ole ai i ke kula.
E paipai a e huliamahi kakou i ke kue ana i keia mau pilikia o ke kula. Ina e kue ana hookahi wale no haumana he hookahi lima mana ole ia, aole e hookoia ko kakou makemake. Aka, ina e kue ana na haumana apau, pela hoi, he puupuu lima ia, malia paha e hookoia ana ko kakou makemake. Aole anei?
Nolaila, e holo mua kakou. E na kanaka e huhu ana i keia makehewa o ke kala, e hui pu kakou a kamailio. E hookoia ko kakou makemake ana e hooku kaa me ka uku ole ana. Aole pono kakou e hoopihoihoi i ka piha ana o ka hale hooku kaa mai keia hope aku. Hiki ia kakou ke hui me na kanaka e malama i ka hale hooku kaa a wehewehe i keia pilikia nui. Ina kupaa kakou, hiki paha ke eo. He pilikia keia no na haumana apau, aole no hookahi wale no haumana. Nolaila, pono kakou e olelo me ka leo nui ame ka manao paa. E ala! E alu! E kuilima!
© 2008 . Sanoi Peahu
