Ke Kaili Ana i ke One Maoli
na Iwalani Inouye
Auhea oukou e na hoa heluhelu o Hawaii nei! Aia kekahi ala hou e kuai aku ai i ka aina o Hawaii. Ma mua, ma o ka oihana kuai aina wale no e kuai ia ai ka aina. E hoolahalaha mua ia ia aina a me ka hale a pulima ia na palapala he nui. I ia ala kahiko, nui no ka hana e kuai aku ai i aina. Aka nae i keia au oi aku ka maalahi o ke ala hou. Hiki ke hana ole ia ua hana la. Aole pono e pulima ia hookahi palapala. A aole pono e loaa kekahi mea kuai aina. Okoa a maalahi no ka oihana kuai aina i keia manawa. Ina e kuai aku ana oukou i ka hale, e heluhelu no i ka mea o lalo.
I kela pule hoomaha aku nei, hele aku nei au i kahi kuapo e ike ia na mea like ole. Oiai makou e holoholo ana i laila, ike ia kekahi mau omole Corona i piha i ke one a me ka lepo maoli mai ehiku wahi. A hoohee ia ka pilali ulaula ma luna pono o ia omole i paa ke one i loko. Hoihoi keia mea no laila kamailio aku au i kela wahine e kuai aku ana i ia omole one. Wahi ana, loaa ke one mai ehiku wahi i Maui, o ia no elua wahi ma Hana a me Haleakala, a me na kapakai o Kalepolepo, Oneloa, a me Keoneoio.
Wahi no hoi a ia wahine i kamaaina ole i Hawaii nei, ma ka hewa kona ohiohi ana i ke one a me ka lepo mai kekahi mau wahi aka nae ma muli o ka nani launa ole o ke one a me ka pupu, na wai e ole ke kaili ana aku. A maikai ka haawi ana aku i ia one me he makana Kalikimaka la.
No laila, waele ia ke ala hou i Hawaii nei. Hiki ia oukou ke ike, maalahi no ke kuai ana aku i ka aina i keia au. Hiki ke hoiliili wale ia ua one nei a kuai ia aku i na malihini a me na kanaka e ae. A aole keia he pilikia. I ka manawa a kakou e noonoo ai i ke ala kahiko, nui na hale i kuai ia aku i na kanaka no ka aina e mai. A ma kekahi wahi, ano ilihune ka poe kamaaina. A aole no hoi o keia he pilikia no ka mea nui ke kala i loaa mai keia kuai ana aku. Ke holo mau nei ka noeau hookele waiwai. Like no na ala elua.
Ma muli o ka maalahi o ka hele ana i keia ala hou e nui ana paha ka iini o kanaka i keia one a hoiliili na kanaka he nui i ke one maoli o Hawaii nei. A ina penei ka hana, e kuai ia aku ana ke one i na welelau o ka honua. E lilo ana ke one i na haole like ole. I ka manao o na kanaka polohuku, maikai keia no ka mea e lupalupa ana ka waiwai o Hawaii ia lakou. Aka pehea e ola ai ka kakou mau keiki i ko kakou aina maoli ina kaili ia no ke one he nui? E nele ana o kai i ke one maoli ole, a e lawe ia aku ua one la i ka aina e i luana ai na haole i ko kakou one aloha. Aloha ino. E pau ana ke one hanau o na keiki no ka mea i ka manao o keia au hou, o na malihini ke malama ia o hele no a ilihune na kanaka o Hawaii. Aka nae o ka hana keia e pono ai na kanaka kikoola – o ka imi ana i ka waiwai maalahi a hoohaumia ia ka loina Hawaii.
Ma muli paha o ka lakou hana, paakiki ka nohona ma na mokupuni a pau o Hawaii nei. Pipii loa na hale ma muli o ke kaili ia ana o ke one e na kanaka ona miliona. Nui na kuewa hale ole no ka mea aole lawa ke kala e kuai mai ai i hale. Ina pomaikai lakou i ka loaa ana mai he hale, e ma'i ana paha ke kino ma muli o ko lakou uku ana i kela hale miliona. I ka haku ana i kekahi Paredaiso a na malihini e mahui ai, waele a hoonani ia no ke ala i hiki ai ia lakou ke nee i Hawaii nei. Huna ia ka pilikia a me ka ilihune o ka poe kamaaina. A o keia paha ka pilikia no ka mea malama ia na malihini a malama ole ia na kamaaina. Aole paha pono ke kaili ana i ke one no ke kuai ana aku. Tsa!
© 2006 . Iwalani Inouye |
