Ke Olai Hoopunipuni
na Kaluhialoha Eldridge

I ka hopena pule o ka la Hoomaikai, ua lohe ia kahi nuhou weliweli. Wahi a ka lohe, e olai nui ana ka honua ma ka moku o Keawe, a ma muli o ia olai o ka honua, e ee ana ke kai ma ka mokupuni nei, ma Oahu. Ma muli o ia olelo hoopunipuni, ua hana pupule na kanaka he nui i ka lohe ana. Ua mu pu mai na maka kanaka ma na hale kuai he nui e kuai mai ai i na mea e pono ai ka ohana, e laa ka wai, ka meaai, a me na pono e ae.

O kekahi mea e hoomaopopo ai, aole hiki ke mahui ia kahi olai o ka honua, he mea ia i hiki ole ai ke alo ae. Eia nae, poina kela kanaka keia kanaka i keia kuikena, ke lohe ia kahi nuhou weliweli. Eia kekahi, i ka lohe ana aku o hookahi kanaka i ia nuhou like, aole paha o ia e hilinai aku ana i ka mea nana e hoopunipuni mai, aka ke pii a nui ka huina o na kanaka e hilinai ana i kahi nuhou weliweli, oi aku paha ka maalahi o ka hilinai wale ana aku ia hai. Aole o ka nui o na kanaka e hilinai ana i kekahi nuhou ka mea e koho ai oe he oiaio, aole paha. Pehea la ka noonoo ana o ua poe puniwale nei? Ina e lele ana kekahi mai ka uapo iho, aole oe e hahai ana i kana hana pupule, ea?
He mea ko laila e ao mai ai. Pono ia kakou ke noonoo pono, ke kupu mai kekahi pilikia. Aole e hoolohe wale aku i ka hai e hai mai ana. He mea ino ka hoopunipuni ana i na mea weliweli o piliwi ole ia, ke kupu maoli kekahi popilikia. E loaa ana auanei he poino.

© 2006 . Kaluhialoha Eldridge