Ka Manu Ai Pilau o ka Wili Makani
na Iwalani Inouye
Aloha pumehana mai kakou e na hoa makamaka mai ka mokupuni o Keawe a hiki loa aku i Niihau o Kahelelani. Laulaha i na mokupuni a pau he pilikia o na mamo o Hawaii nei i keia au. Ke hulihia nei ko kakou manao i ka leo nani o na manu ai pilau. A lilo ka malu ulu i malu hao i uka. Wili ka makani Kauaula a luku ia ke ola o ua malu ulu nei.
I ka mahina o Iune, kupu ae nei na ilo hao ma ka huli komohana o Maui. I loko no o ka ike ana o ka poe i ke ala a ka mahi hao i hoohana ai e halihali i ia mau mea hao, ua malu no ka hana o na kanaka mahi hao. Aole maopopo i na kanaka ka lilo ana o uka. No laila i keia la, ulu ae iwakalua kumu laau he 180 kapuai ka loihi a na wai e ole ka nana ana i uka.
Wahi a ka poe o Kaheawa Wind Power, LLC he mea waiwai ia mau wili makani iwakalua no ka mokuaina o Hawaii a me ke kulanakauhale o Maui. I mea lakou e hoolako ai i ka poe o Maui i ka mana mai ka makani mai. A ma ka lakou punawele i www.kaheawa.com wahi a lakou ma muli o ka lakou hoohana ana i ka makani like o ko kakou kupuna i malama a hoohana ai, e hoemi ana ka haumia o ka lani. He mea oiaio paha keia aka pehea ke ola o na mea i ka honua nei?
O ka mea mua, ua pupuka launa ole keia mau wili makani. Ia makou e auau ai i kahakai ma Kihei a me Wailea, hiki no ke ike ia ia mau wili makani. Me he mea la, ua mai ke kuahiwi kohu keiki i mai i ka ulalii. Eha ka piko o ke kuahiwi no ka mea paa ia i lalo o ke aa hao. Hehi ia ke ola o Maui nui a Kama. Aole holo mua na mea i ka honua e like me na mea i ka wa kahiko.
O ka lua, haaheo no o Kaheawa Wind Power, LLC i ka lakou kukulu ana i ka malu wili makani nui loa. Oi aku ka nui ma mua o na malu e ae i ka mokuaina o Hawaii, i kaena ai lakou. No laila, me ia iwakalua wili makani ma 200 eka, e lawa ana ka mana o ka makani e hoolako i 11,000 kanaka. Maikai keia aka ina ulu ae ka makemake i loko o lakou e hoolako ia Maui kaokoa, pono o Kaheawa Wind Power, LLC laua o kona mau hoa oihana e kukulu i 255 wili makani. E kukulu ia ana ia 255 wili makani ma ke kahua ma kahi o 2,550 eka. Like no paha keia me eha pa o ke kula nui o Hawaii ma Manoa. Nunui na eka a lakou e kaili ana no ka wili makani. Aka nae, ina ku kekahi mau wili makani no ka nele ana o ka makani, e liilii ana ko Kaheawa Wind Power, LLC mana makani e hoolako ai. No laila, e kupu ia kekahi mau wili makani hou aku. Aia i hea ka waiwai o keia no ka poe o Maui a me ka poe Hawaii maoli? A ehia mau kala a lakou e hoolilo ai no keia mau eka he nunui? I keia la, pono wale no lakou e uku 12,000 kala i kela me keia makahiki. Kupono ole no keia uku no ka mea loaa ka aina hiwahiwa ia lakou. A o kela no ke kahua lipolipo o na kanaka maoli.
O ke kolu o ka pilikia, wahi a Kaheawa Wind Power, LLC, oi aku ka emi ana o ka mana makani ma mua o ka mana maamau no ka mea aohe uku keu hou no lakou. No laila me ia mau mea, e haule no ka uku ana o ka uila no ka poe o Maui. Aka i ka manawa a ka mana makani e hiki ai i ka poe, aole paha keia ka hana. Like no paha ka manao oihana o ka mana makani me ka mana maamau. Hoopa ia ka mana e ekolu mau lima no laila pehea e malama ia ke kala no ka poe o Maui?
O ka pilikia e ae o keia mea kuwaho, aole keia he mea waiwai no ka poe o Maui a me ka poe maoli. Wela no o Maui a ikiiki i kekahi mau la. No laila, hoohana no kekahi kanaka i ke ea oluolu a me ka peahi uila no ka manawa he nui. Ina pela, aole lawa ka mana o ka wili makani. Aia no a hulihia ole na wili makani a laila, aole lawa ka mana hou i ka poe o Maui. Ua olelo ia, ke holo pono na wili makani, loaa na µw he 30 µw aka i ka manawa o ka makani e pa ole ai, loaa he ewalu wale no µw i ka poe. Ke himeni oolea nei paha ka manu ai pilau i ka mele a kakou e makemake ai.
No laila, e kuu mau makamaka e, e akahele. Mai piikoi i ke akule. He pilikia paha keia no ka mea e lilo ana paha na mea maoli. Me ka huli kua ana, ke ae nei kakou e uhi ka aina i na mea kuwaho. E ulu paha ka kakou mau keiki me ka ike ole o ka nani o ke kuahiwi maoli. E ike wale lakou i ke kuahiwi i uhi i na kumu laau hao he nui a he mokupuni i laukanaka ia e na manu ai pilau. Mai ae ka ka hoololi ana o ka manu hoolaukanaka o ia uka iu ana ia Maui a me na mokupuni e ae. Aole maikai keia no ka uau, ke ao, ka opeapea, ka nene, a me na mamo o Hawaii. No laila, ina hele a kaumaha ko oukou mau naau i keia nuhou pauaka, e kakau aku i kekahi leka ia Mayor Alan Arakawa, Mayors Office, County of Maui, Kalana o Maui Building, 200 South High Street, 9th floor, Wailuku, Hi 96793-2155. Pono kakou e ku pu a hooku ka makemake o Kaheawa Wind Power, LLC e hoonui i ia mau malu hao.
© 2006 Iwalani Inouye
|
