Ku mai o Kalani Aimoku
na Kauahaao
O Liliu Loloku Walania Wehiwehi Kamakaehaokinau ke alii wahine i hanau ia i ka la elua o Kepakemapa, MH 1838. I ka la elua o Kepakemapa i keia makahiki nei, ua hui pu ka poe aloha aina e kupaa ma hope o Liliu a e hoohanohano hoi ia ia i kona la o ka hanau ia ana.
Ua piha no ka pa oluolu o Iolani i na kanaka he mau haneli, a e like me ka Liliu i kauoha ai i kona poe i na la o ka hookahuli aupuni, ua hui no na oiwi me ke aloha a me ka maluhia.
He nui wale na makamaka oiwi i hiki aku i laila no ia la hooheno. Ike ia na maka kaulana o Aaron Mahi, Kuuipo Kumukahi, Victoria Holt-Takamine, a me Keola Lake kekahi. Ma mua iki o ke ku ana o ka la i ka lolo, ua akoakoa na kanaka o laila ma ke alapii mua o ka hale alii. I ia manawa no i hiki mai ai o Keola Lake, a hapai ia aela ka leo oli o ke anaina. O ia oli ana aku a me ka himeni pu ana i ka Mele Ai Pohaku kai lilo i makana aloha no ia mo-i o Liliu. Ua aa no hoi na olapa like ole i ka hula, i mea e olioli ai kanaka a i lohe ia na mele kaulana i haku ia no ko kakou alii.
Eia kekahi mele inoa i haku ia no ka hanau ana o Liliu. Aole i lohe ia ma ka hui ana o na kanaka i ka hale alii, aka he mea i pili no i ka manao o ia la.
Ku mai o ka lani aimoku
I hanau ia i Ikuwa
Ka onohi lani o ke kapu
Kapukapu wale ka wahine no ka
hiwahiwa a Papa
No Papanuihanaumoku
No ka hono ao Piilani
Me ka pali kapu ao Kakae
No ka heiau ao Pakaalana
Kapu ia wehi no ka lani
Ka uila me ka hekili
Ke anuenue pio i ka lewa
Ka punohu ula i ka lani
Ka ua koko i ka moana
E lei ia ko wehi hanohano
E Liliu o Loloku i ke kapu.
He inoa no Liliuokalani.
|
