Poipu i na leo oiwi
na Kauahaao

O "alone with my thoughts" kahi inoa okoa o keia paleo hou a Aaron Sala. Aole nae i mehameha ka noho ana me ia mau manao like ole.

I kuu lohe mua ana i ka pa sede hou o Ka Upu Aloha, ua poipu no i ka hana a keia puukani, kai hanai ia e ka ua Olauniu o uka. Lohe ia ka pii a emi o na leo mele a me na kani like ole o na pila he nui wale, oia
no oe o ke poi ana o ke kai kuakea. Hoakoakoa ia na hoa mele e hapai pu i ka leo a paa ma keia pa. Hoiliili pu ia na mele like ole a na kupuna a me na mele akahi a haku ia e ko nei wa haku mele.

O ka mea i puiwa maoli ai keia wahi wilipa, oia hoi ka lua o na mele i paa ma anei. Na Kaumakaiwa Lopaka Kanakaole i haku i ke mele i kapa ia ke "Mele kakepakepa aloha," a, e like no me ka mea e mahui ia ma ka Lopaka ano mele, he mau olelo ui maoli ko laila. I ke mele ana mai nae, aole ia ka mea i mahui ia! Komo mai na ano like ole o ke mele, ka pila, ka pana, a me ka leo mele. I kekahi hapa, kohu opera ke lohe aku, aka malama pu ia ke oli kahiko a me ke kani o ka pahu Hawaii. Pela pu ke ano o ka sede holookoa, a ua komo no na ano a pau o ka sede i keia mele hookahi.

Eia nae ka‘u olelo aoao ia oukou, e na pepeiao puni mele, mai no a punia i ka luaehu o nei wahi aahu, no ka mea he lole wale no ia. Aka o ka maka i ike aku i ke kumu o ia mele, o ka lima hoi nana i hoonohonoho i ka olelo o loko, he Hawaii maoli no ia. Hoolale ia no oia e na leo okoa o ke ao nei, a komo mai ia mau leo i keia hana, aole nae i lilo loa aku i Kalalau. Ma lalo iho o ia mau aahu kauluwela, aia no he piko Hawaii e kupaa ana ma ke ano haahaa leo hane o kupuna. Lohe ia no kela leo kiakahi ma nei mele a Lopaka, lohe pu ia i na mele aloha aina o keia paleo. Eia ma lalo iho nei kekahi o ia mau mele kupaa.

"Hanohano Manoa."
Na Keawe Lopes keia mele i haku no kona aina aloha o Manoa. Kunou ia ka moolelo kahiko o ia awaawa ma o ke komo ana mai o ka ua Tuahine, Kahalaopuna, a o Kahaukani hoi. A o ke kukui malamalama o ia wahi, o ke kulanui, lilo ia i "mokuahi imi noeau."

"A oia!"
Na John Kameaaloha Almeida keia mele kamaaina. Ua hana hou ia ma anei e Aaron me kona poe hoa mele o Kama Hopkens, Chad Takatsugi, Jeff Auhoy, a me Steve Jones. O ke kani o ka piano a me ke kika kila ka mea e hialaai loa ai ka lohe ana aku.

"He Ono."
He mele kahiko keia na Bina Mossman i haku ai. Nui ko‘u mahalo i ka hoopaa hou ana i ke mele holookoa ana i haku ai, i ike ia ka ono o ka manini a me ke kole maka onaona o ke one hanau. Hookuu mau ia keia mau ia i kai ke himeni ia ke mele, aka na Aaron e ka hou i ka makau a loaa hou mai ka ono o ka ia.

"Ehuehu mai nei o Manoa."
Na Kihei de Silva keia mele hou, me ka hahai ana aku i ke ano a me ka manao o ke mele kahiko a S. Kaili, o "Halepiowai" ka inoa. He mele lahui keia no na opiopio o keia wa a me na pua a Pauahi. He wa keia o ka nui ehuehu e hopohopo ai kanaka, aka e kupaa ka poe ili ula ma hope o ko kakou alii a me ka lahui aloha.

E nana aku ka maka i ka aoao elima o nei nupepa aloha no ka ike ana aku i na hua olelo o ia mele lahui hou, oia hoi o Ehuehu mai nei o Manoa. E naue pu aku ia kipukaleo.org no kekahi mau manao.