KANI NA LEO OIWI O HOOKANI MANOA
na Lokelani Fergerstrom

Aloha mai e na hoa olelo Hawaii mai ka mokupuni o Keawe a hiki loa aku i Niihau a Kahelelani. Ua hoomaka hoi ke kau Kupulau ma ke kulanui o Manoa, a he wahi hoomanao no keia i na papahana olelo Hawaii ma ke kula nei. O kekahi mea nui o ia hoi o Hookani Manoa.

Malama ia o Hookani Manoa ma lalo o ke komike Kawaihonaakealoha o ia hoi ka Mele Institue o ke keena olelo Hawaii a na Kumu Keawe Lopes e alakai nei i ua komike nei. Ma waena o ia komike a ka hana nui o na kumu olelo Hawaii, ua hoomau ia ka olelo makuahine ma na alahele like ole o na mele Hawaii, aole o Hookani Manoa wale no kai malama ia. O kekahi o na papahana o ia hoi o Ke Welo Mau Nei. He papahana ia no na haumana a me na kanaka e ae i hoihoi i ka manao o ka haku mele, a i ole ka poe i imi i ka manao o na mele i haku ia ma mua e laa na mele lahui. O ka papahana elua, o ia ka malama ia ana o na mele Hawaii ma ka pa leo. He papahana no ia e hoopaa i na mele ano kakaikahi o ka lohe ana ma na cd, a me ka lolouila kekahi. I holomua kakou i ka oki leo ana i mea e malama ai i keia mau mele. Ma waena o ua mau papahana nei kupu maila ka manao e malama i papa mele nana e imi noii i ka ike o na wahi pana. O ia papa o Haw 483: Papa Mele Wahi Pana, a ma laila no e imi noii ai a imi aku i ke kaona i loko o nei ano mele. He alahele no ia e malama ai i ka manao o ka poe Hawaii o ka wa i hala. Ma hope iho, kupu maila ka manao e kono aku i na hookani pila e kaanalike i ko lakou manao o na mele Hawaii. Hoomaka ia akula o Hookani Manoa.

Ua hoomaka ia i eha makahiki aku nei i mea e hoomau ai na mele Hawaii a i keia mau la e hoomau ia ana no. Na na puukani kaulana o Hawaii nei e hele mai i ke kulanui e hookani no ka poe Hawaii. I ka makahiki kula, malama ia elua mahele o Hookani, aia ka mea mua ma ke kau Haulelau, malama ia o Hookani Reminisces. Ma ia wa hele maila ka poe e himeni i na mele i hoohalialia ia e ko kakou mau kupuna. O ka mea mua i hele mai i ke kau aku nei, o ia hoi o Anake Karen Keawehawaii laua o Anakala Kawai Cockett. He mea nahenahe ke lohe ia na mele i himeni pinepine ole ia i keia mau la.

I keia kau, e malama ia o Hookani Continues, a ua kono ia na poe opio o ka himeni ana. Aia ka mea mua ma ka la 13 o Ianuali, hiki maila Na Kama i mea e hoomaka ia ai ke kau kupulau ma Manoa Gardens. He nani palena ole ke lohe ia na leo nahenahe o ia hui mele. Hookani maila lakou i na mele i kamaaina ia kakou o ia hoi o Alekoki, o Makee Ailana, a o kekahi mau mele hapa haole. Hiki maila na poe like ole e hoolohe i na mele Hawaii. A o ka maka mua wale no ia.

I keia kau e kipa mai ana o Natalie Ai, o Pueo Pata, o Na Hoa, a o Puka Asing. O ka mea nui loa o nei kau, o ia hoi ka Finale o ka makahiki 2006. E malama ia ana ua mea nei ma Andrews Amphitheater ma ka la 29 o Apelila. Ma ka finale, e hele mai ana kekahi mau puukani kuikawa, o ia hoi o Hauoli Akaka, o Anakala Kimo Alama Keaulana, o Sean Naauao, a o Na Palapalai. Aia ana no he mau mea hou aku, no laila e makaala oukou i ia mau poe i kukala ole ia. He mea waiwai no ka hoike ana aku i na kupuna, o ka olelo Hawaii kahi mea e pulama mau ia nei e na opio o keia ao.

Ma loko mai o ua papahana nei, kamailio iki na kanaka e pili ana i na mele e himeni ia. He wahi manawa ia e noonoo ai i na manao o na mele. Oi aku ka nani o na mele ke maopopo ka manao ma mua o ka hoolohe wale ana aku. Mea mai o Kumu Keawe Lopes, “Maopopo ia kakou ka nui o na ike e paa nei ma na mele.” Ke maopopo ka ike o ke mele he manao okoa ke lohe aku.

E malama ia ana no o Hookani Manoa i elua manawa o ka mahina, no laila i ka la 3 o Pepeluali e kipa mai ai o Natalie Ai me kona hoa hookani. Ua hoomaka o ia i kana himeni ana i kona wa opiopio, ia ia e hula ana me kona mau makua i ka Halau Hula Olana. Ma laila no i lohe mua ia ai kona leo nahenahe. I keia manawa ua oki ia akula kana cd mua o ia hoi o E. He mea kupaianaha ka hookipa ana ia ia. E hele pu kakou e paipai i ka olelo makuahine o neia aina a me kona mau puukani.

Eia ka alemanaka no na aha mele o keia kau e waiho la i ka aoao nei o keia nupepa aloha o kakou. E nanea pu kakou i na mele oiwi!

© 2006 Lokelani Fergerstrom