HONGI PU KAUA I KA IHU O KA WAKA
na Emalani Case

Huakai ko Hawaii i WIPCE ma Aotearoa!!

Akahi no wau a ike i ka nani o Aotearoa. Ma laila no wau i kaana like ai i kou ha me na kanaka Maori o ia aina. Ma laila no wau i lohe ai i na leo o na kupuna a me na keiki. A ma laila no wau i hele wawae ai ma ka honua o na kupuna i hala. Piha kou naau i ka hauoli i kou hele ana i Aotearoa. Nui kou mahalo i ia aina a me na kanaka e noho ma laila. Ua haahaa no wau i ko na kanaka Maori hoike ana i ke aloha palena ole ia makou kai huakai aku. I kou hoi ana mai i kuu aina o Hawaii, ua ano kaumaha wau i ka pau ana o ka huakai. Aka no nae, maopopo iau o keia ka hoomaka ana o ke alahele hou. Ua hiki iau ke hele i Aotearoa. No laila, he kuleana kou. Pono wau e kaana like i na haawina au i ao mai ai me na kanaka i hele ole.

Ua hele makou o kou hui o Makalii i Aotearoa no ka hele ana i ka aha o WIPCE [o ia hoi ka World  Indigenous Peoples  Conference on Education].  Aka, o ka makaikai ana i kekahi mau wahi kuikawa a me ka launa ana me na poe o ia aina na mea nui a makou i hana ai ma laila. I kekahi la, ma mua o ka pau ana o ka  aha, ua hele makou i ke kahawai no ka hoe waa ana. Ua komo makou i ka waa Maori, o ia hoi ka waka, a ao mai i na kahea pono a me ka hana pono ana i ka hoe. Ua lealea no ka hana a ua maikai ka hana ana me ka laulima. Ua pupukahi makou no ka holomua ana. Ina hiki i na poe maoli ma ka aina e ke hana e like me keia, hiki paha ia kakou ke holomua kekahi.

He hui waa ka hui o Makalii. No laila, ua ao mai makou i na mea e pili ana i ka waa. I kekahi la okoa, ua hele makou i ka hale hoikeike a ike i ka waka o Te Winika. He waka kahiko loa ia, a i kekahi mau makahiki aku nei ua kanu na kanaka Maori i ia waka ma lalo o ka honua no ka mea, ua makau no lakou i ka hoopoloke ana o ka poe malihini i na waka. Ua loaa ka waka i na kanaka Maori i keia wa a he hoailona ka waka no ka hoomau ana o ka moomeheu Maori. No laila, he waka kuikawa ia. I kou ike ana i ka nani o ia waka, ua piha kou mau maka i ka wai no ka mea, ua hiki iau ke hoopa i kekahi mea kahiko loa a na kupuna Maori i kalai ai a ua hiki ke maopopo iau ka mea nui o ka hoomau ana i na haawina o ka waa.

Ua hauoli no wau i kou huakai ana i Aotearoa. Ua holo wau ma ka waka, ua himeni wau i mau mele hou, a ua ao mai wau i na haawina maikai. No laila, e hoomau ana wau i ke kakau ana i moolelo e pili ana i na mea nani o ka aina o na ao loa a me ka poe ikaika o ia wahi. Mahalo nui e na kupuna i hala, mai ka aina o Aotearoa a me kuu aina o Hawaii, no ka haawina nui a makou i ao mai ai ma Aotearoa, a no na mea au e kaana like ai i ka wa e hiki mai ana.

© 2006 Emalani Case