E ULU ANA KE ALOHA O KUU HAEHAE!!!

Ma ka la 26 o Ianuali i loaa mai ai keia nuhou, a holo no ka manao e pai aku ma keia mau lau o ka Hoi i hele a laha ma ka aina nei. E heluhelu mai.

ALOHA NUI E KA ULU HOI ME KONA LUNA HOOPONOPONO ALOHA NUI IA. He wahi noi wale no keia, i mahele liilii o kou wahi kino holomua i ke au e nee nei no ka hoolaha wale ana no i ka hana a maua o ka-u wahine. Ua paku-i ia kahi olelo hoakaka no ka aha mele i kapa ia kona inoa o Kuu Haehae 2006. He mahalo wale no ko one-i no nei hanana e ulu nei i ka hoi o ke au o ka manawa. O ia ihola me ia mea i oi ae ma ka honua.

KEAWE LOPES

No laila, e na hoa mukiki wai o Kawaihuelani, e ike ana kakou i ka mohala ana mai o keia mala pua a Keawe laua o Tracie, o ia hoi ka halau o Ka La Onohi Mai o Haehae. Ma ka la 12 o Malaki e maaa ai na kukuna la o ia halau, a o ka mehana ihola no ia o ke anaina. O ia no ka la o ka aha mele i kapa ia o Kuu Haehae. E ike ia ana no na ano like ole o ke aloha o kanaka – o ke aloha makua oe, o ke aloha iniki a ka ipo oe, o ke aloha aina pau ole no hoi.

E komo pu ana na mapuna leo o na hoa like ole – na kalena opiopio o Aaron Sala, Chad Takatsugi, a me Natalie laua o Iolani Kamauu, a pela pu me na alakai i waele mua i keia ala, o Jerry Santos, Karen Keawehawaii, a me Lanihuli Lee.

Hapai pu ia no hoi ke kuleana o ka hula ana e ka halau, a me na hoa hula kekahi, e Anake Flo Koanui, Piilani Smith, a me Ke Kai o Kahiki. A koe aku kahi hanana eleu a Hailiopua laua me Kaliko Baker, na kaeaea o ka Halau Hana Keaka o Hawaii nei. E haiamu na manu i keia mau pua laha ole o Oahu, a ike maka i ka alohilohi o Ka La Onohi Mai o Haehae.

La: 12 Malaki 2006 (he Lapule) . Wahi: Hawaii Theatre . Hola: 6:30-9:00 ahiahi
Likiki: $25 & $30 ma Hawaii Theatre