E hiki koke mai ana ka makahiki 2012, a wahi a na kaula kaulana he nui, mai na kihi eha o ka poepoe honua, he wa ia e hiki mai ana ke au hou no na kanaka o neia ao. Olelo kekahi o lakou no ke kipa ana mai o na mea ao e, ame ka alemanaka Mayan. Hopohopo kekahi o lakou i keia wa kupaianaha e holomua wikiwiki ai ka enehana o keia au hou. Ua nui na hoailona ma na kiionioni like ole e pili ana i ka pau ana o ka honua i na mea ao e, i ka hokunai nunui, a i ole i ke kaua ana mawaena o na kanaka ame na mikini lopako, a pela wale aku. Ina piliwi oe i ia mau wanana, he hoailona no keia no ka wa e hiki mai ana.
I ka po nei, iau e auana ana ma YouTube, ua nana wau i kekahi wikio no kekahi kanaka i kapaia'i kona inoa iho o Eyeborg. O keia kanaka o Eyeborg, ua kuapo oia i kona onohi maka maoli me kekahi mea pai wikio uuku loa, elike me kela kii onioni kahiko o Terminator. O ka mea kupanaha nohoi, ke nana kona maka maoli ma ka hema, hahai no kona maka wikio a hele like hoi laua, me he mea la, he maoli no ia maka wikio. Peia pu ma ka akau, hele no ka maka. O ka minamina, aole i louia i kona lolo, nolaila, mau no kona makapo ma ia maka, aka nae ua hiki ke pai wikio.
O ka inoa maoli o keia kanaka, o Rob Spence. I kona wa keiki ua hoao oia e ki i ka kona papa pu ki lu, a ua ku kona maka i ka poka, a ua makapo kona maka akau i ua poka lele nei, a hiki i keia la. Wahi ana, ua nana mau oia i ka Bionicman ma ke kiwi, a mai laila mai i komo ai ka makemake iloko ona e lilo ua kanaka nei, oia ka cyborg i kapaia o Eyeborg.
Mai kanalua oukou, he moolelo oiaio no keia. A no aila e o'u mau hoa hueu, e maliu kakou ia John Connor laua o kona mama o Sarah Connor, a hoomakaukau kakou no ka La Hookolokolo. E hoolako kakou i na mea kaua, e kiai iho no i ko kakou honua ponoi a pale aku i na mikini lopako, o ala paha kakou maloko o ka Matrix me Neo ma.
© 2011 . Kamuela Fong
