Auhea oukou e na liko o Manoa ame na aa o Ka Ulu Hoi e ulu ana mai ke kuahiwi o Akaaka a hiki mai ka ua Waahila. I keia wa nui o ka hana, ka noonoo, ame ke kuupau ana ma ke kula, eia kekahi mau olelo noeau nana e hooulu mai i kou manao a e hoola mai hoi, i makaukau kakou no ka maka mua o keia kau kula.
I piena ka lio i ka punuku; e komo kaula waha ia ka maikai.
Ina mamake oe e lilo i mee elike me Superman a i ole Superwoman, mai kii e hapai i na kaa nui i kou wa ma ke kula nui. Paakiki no ka noonoo pono ina nunui kou mau kuleana like ole ma ka hana, ke kula, ka ohana, a pela aku. Na keia olelo e ao mai: aole hiki ke pau na hana a ke kanaka ahiu i ka manawa like. Aia ka pono o ka hoopau ana me ka malie. Ina pauhia oe i na haawina ame kau oihana ame kou ohana, e hoonohonoho hou i kou mau hana a koho i hookahi mea e hooko ai, o hele oe a pupule.
Aohe puu kiekie ke hoa ia e pii.
Wahi a ka makia a Kuini Piolani i kukala mai ai, "Kulia i ka nuu." Ikeia no, nui ka iini o na kanaka Hawaii e pii iluna. Aole keia he mea malihini. Mai ka wa kahiko a i ka manawa e hiki mai ana, e piiia no na pali kunihi e kanaka. He mea nui kiekie loa ke nana aku, aka aia no a hoao, alaila oe e pii i ia pae. Mea ole na pilikia nunui ina iaoe ka iini e hoao a holomua a ko kou makemake.
Ako e ka hale a paa, a i ke komo ana mai o ka hooilo, aole e kulu i ka ua o Hilinehu.
He mea maa mau no paha ka hana kaukaulua a na haumana, aole anei? Hoopau wikiwiki ia ka kakou mau pepa i ke kakahiaka nui o ka la e haawiia'i i ke kumu. Hoopaneeia ka hoopaa haawina a i ke aumoe mamua pono o ka hoike. A pela aku no. Aka, ua ike no na kupuna he mea keia e pilikia ai kanaka! E hoomakaukau no kakou no ka wa e hiki mai ana. E hana i ka hana i ka manawa kupono no ka mea e hala koke ana no. A i ia wa no oe e ike ai i ka popilikia.
He pukoa kani aina.
He mea maikai ka hoomau ana, i ko ai na kuleana, ame na haawina kekahi. Wahi a keia olelo noeau, e ulu ae ana na puna elike me ke keiki a e lilo auanei i mea paa loa. Ke hookumu kakou i kahi mea liilii, ina hana nui kakou malaila, e ulu auanei no, me he pukoa kani aina la.
Kau ke keha i ka uluna. Ai no i ke kalo moa.
A pau kau hana nui, e kuu mea heluhelu, e hoomaha no. E kuu ka nae, e nanea hoi i ka pii ana ou i kahi pae oluolu. Mahope o ke ko ana o na kuleana, aohe mea e pihoihoi ai.
Nolaila, e kuu hoa o ka ua Tuahine, mai ae i ka hana e kaohi iaoe. I kou manawa popilikia, e noonoo i keia mau olelo noeau, na hua olelo a ko kakou mau kupuna. E ulu pono ka manao a holomua.
© 2010 . Sanoi Peahu
