Ka Ulu Hoi 10.1

[E ka mea heluhelu. O ka moolelo mua loa keia i paiia ma ka kakou elele kaulana o Ka Ulu Hoi. Pai hou ia ma keia MH hou, ka MH elima hoi o kona welo ana mai ka puu Luahine a i kapa one kea o Kalehuawehe. -LH]

Aloha kakou, e na makamaka heluhelu mai ka mokupuni o Hawaii a hiki loa aku i ka mole olu o Lehua. Aloha kakou apau.

O keia ke pai hou ana o ka nupepa olelo Hawaii, oia hoi o Ka Ulu Hoi. I ka makahiki 1971 ma keia kula nui o Hawaii ma Manoa, kahi kaulana i ka ua Tuahine, ua hookumuia kekahi nupepa e ka Hui Aloha Aina Tuahine ame na haumana eleu o ia wa. A kupu mai ka inoa o kela nupepa o Ka Ulu Hoi, mai ka olelo noeau "Ulu ka hoi i ka ua Tuahine." O ka hoi, he ano uala ia, a he mea ia e hanai ai i ke kino. O Ka Ulu Hoi, he mea ia e hanai ai i ka noonoo. A eia no ka hoi a lakou paionia, ke noho i ka hooulu ana mai o ka ua, o ka ike hoi o ko kakou poe kupuna, i keia malaai o Manoa.

Eia kekahi manao e ae no ka hoi ame ka ua, oia no ko laua pili i ka hoonaauao. He pono kekahi wahi e ulu ai keia hoi, o ka uala, ame ka hoihoi o ke kanaka. Oiai he aina uluwehi o Manoa i ka nui o ka ua, a he aina kaulana ia i ka nui o ka hoonaauao ana, he wahi kupono o Manoa nei e ulu ai keia mau hoi. O ka hoi e ulu ana ma keia wahi, oia no ko kakou iini e ao. Na ka ua Tuahine o Manoa e hanai i ko kakou hoi. A o ka ua ke kumu e ulu maikai ai ko kakou ike.

Na na haumana eleu i hookumu i keia nupepa, a eia no kakou ke hahai aku nei i ke ao o ka makua e hoopaa a kuonoono ka ike. Me he ua la ko lakou hana, nana i hanai ia kakou. A eia nohoi kekahi hoi a lakou ala i hooulu ai, o ka papa haku nupepa o Ulu ka Hoi. Hookumuia keia papa i mea e hoomau ai i ka olelo ma o ka heluhelu ame ke kakau ana. A maanei no e hui pu ai ko kakou mau manao. Nolaila, e ala e na kama o nei aina, a ai pu i ka hoi a e hooulu i kou hoi i hoonui aku i ka ikena a maona ka opu.